Belsendiler flotılııasy Gazanyń teńiz blokadasy aýmaǵyna jaqyndady
ASTANA. KAZINFORM – Gýmanıtarlyq kómek jetkizý úshin Gaza sektoryna qaraı bet alǵan halyqaralyq flotılııa ashyq teńizde túrli oqıǵalarǵa tap bolyp, álemdik qaýymdastyqtyń mıssııany toqtatýǵa shaqyrýymen qatarlasa júrip jatyr, dep habarlaıdy Kazinform agenttiginiń menshikti tilshisi.
«Sýmýd flotılııasy» dep atalǵan bastamanyń uıymdastyrýshylarynyń aıtýynsha, quramynda 40-tan astam keme men 500-ge jýyq qatysýshy bar top 1 qazanǵa qaraǵan túni Izraıldiń buryn osy sııaqty mıssııalardy toqtatqan teńiz aımaǵyna jaqyndaǵan.
Belsendilerdiń málimetinshe, jaryǵy joq birneshe belgisiz qaıyq flotılııaǵa jaqyndap, keıin shegingen. Sonymen qatar, kemelerdiń ústinen ushqyshsyz ushatyn apparattar (drondar) únemi baqylaý júrgizip jatqany aıtyldy.
Brazılııalyq belsendi Tıago Avıla áskerı kemelerdiń biri flotılııanyń baılanys júıelerine zaqym keltirip, Alma jáne Sirius atty jetekshi kemelerdiń mańynda qaýipti manevrler jasaǵanyn málimdedi.
Soǵan qaramastan, qatysýshylardyń aıtýynsha, gýmanıtarlyq mıssııa óz baǵytynan aınymaǵan. Flotılııa quramynda ár elden kelgen parlament músheleri, zańgerler men adam quqyqtaryn qorǵaýshylar bar. Olardyń qatarynda shved ekoaktıvısi Greta Týnberg te júr.
Uıymdastyrýshylardyń aıtýynsha, bul bastama gýmanıtarlyq sıpatta ótip jatyr jáne eshqandaı áskerı aralasýdy kózdemeıdi. Túrkııa drondar arqyly jaǵdaıdy baqylaýda ustap otyr. Al Italııa óziniń kemelerin Gaza jaǵalaýyna 150 teńiz mıli qalǵanda toqtatatynyn habarlady.
Ispanııa qajet bolǵan jaǵdaıda qutqarý kemesin jiberýge daıyn ekenin málimdedi, biraq ol Izraıl teńiz blokadasy dep jarııalaǵan aımaqqa kirmeıdi.
Izraıl bıligi buǵan deıin birneshe ret flotılııanyń Gazaǵa ótýine jol bermeıtinin málimdegen bolatyn. Resmı Tel-Avıv bul áreketti «pıar-naýqan» dep atap, onyń HAMAS uıymymen baılanysty ekenin alǵa tartady. Sonymen qatar, gýmanıtarlyq júkti Izraıldiń Ashdod porty nemese Kıpr arqyly túsirýdi usynǵan.
Listen to the Prime Minister of Italy @GiorgiaMeloni.
— Gideon Sa'ar | גדעון סער (@gidonsaar) September 30, 2025
The US, Israel, and leaders from the Middle East and around the world are trying to bring an end to the war.
The focus should be on de-escalating, not on orchestrating provocations, such as the Hamas-Sumud flotilla.
It is… https://t.co/6LSWuU3vqb
Maýsym jáne shilde aılarynda osyndaı mıssııalar Gaza jaǵalaýynan 100 teńiz mıli aralyǵynda toqtatylǵan.
Qaýip-qaterlerge qaramastan, flotılııa músheleri Gaza sektoryna qaraı qozǵalysty jalǵastyratynyn aıtyp otyr. Batys aqparat quraldarynyń habarlaýynsha, Izraıl arnaıy jasaqtyń kómegimen flotılııany toqtatý múmkindigin qarastyryp jatyr.
Bul jaǵdaıǵa tarıhta bolǵan oqıǵa da yqpal etken. 2010 jyly Mavi Marmara kemesi halyqaralyq sýda toqtatylyp, 10 belsendi qaza tapqan. Bul oqıǵa Izraıl men Túrkııa arasyndaǵy qatynastarda kúrdelenýine sebep bolǵan edi.
Blokadany buzý áreketi halyqaralyq qaýymdastyqtyń alańdaýshylyǵyn týdyryp otyr. Italııa premer-mınıstri Djordja Melonı belsendilerdi «dereý toqtaýǵa» shaqyryp, olardyń áreketi atysty toqtatý boıynsha júrgizilip jatqan iske kedergi keltirýi múmkin ekenin atap ótti. Rım Papasy XIV Lev óz kezeginde eshqandaı zorlyq-zombylyq bolmaıdy jáne barlyq taraptar sabyrlyq tanytady degen úmitin bildirdi.
Al Greta Týnberg BBC arnasyna bergen suhbatynda flotılııa tek sımvolıkalyq qadam degen syn-eskertýlerdi joqqa shyǵardy.
«Ómirine qaýip tóndiretin áreketke eshkim jaı pıar úshin barmaıdy dep oılaımyn», – dedi ol.
Flotılııa uıymdastyrýshylary kemelerdiń qozǵalysyn tikeleı efırde YouTube arqyly taratyp, naqty ýaqyt rejıminde baqylaýǵa múmkindik beretin onlaın-treker iske qosqan.
Aıta keteıik, BUU sarapshylary men Halyqaralyq kólik qyzmetkerleri federatsııasynyń (ITF) málimetinshe, BUU-nyń Teńiz quqyǵy jónindegi konventsııasyna sáıkes, halyqaralyq sýlardaǵy kemelerdiń erkin qozǵalysqa quqyǵy bar. Qarýsyz gýmanıtarlyq kemelerdi aýmaqtyq sýlardan tys jerde toqtatý halyqaralyq quqyqty buzý retinde baǵalanady.
Osyǵan deıin belsendiler Gazaǵa baǵyt alǵan teńiz flotılııasyna dronmen shabýyl jasaǵanyn habarlaǵan bolatyn.