Belsendiler Úlken Almaty ózeniniń jaǵalaýyndaǵy qurylysqa shaǵymdandy
ALMATY. QazAqparat - Almatylyq ekobelsendiler Úlken Almaty ózeniniń jaǵalaýynda zańsyz salynyp jatqan qurylysqa shaǵymdandy. Qalalyq ákimdik bul jaǵdaıǵa qatysty túsinikteme berdi, dep habarlaıdy QazAqparat tilshisi.
«Almaty qalasynyń ekologııalyq qoǵamy» tobynyń Facebook paraqshasyna belsendiler merdiger kompanııa Sátpaev kóshesi men Abaı dańǵyly aralyǵyn, ıaǵnı Úlken Almaty ózeniniń jaǵalaýyndaǵy jasyl aımaqty zańsyz qorshap aldy dep jazdy.
Olar jaqynda aǵashtar kesilýi múmkin dep boljady.
Qala qurylysyn baqylaý basqarmasynyń baspasóz qyzmeti atap ótkendeı, Almaty qalasynyń memlekettik jer kadastrynyń avtomattandyrylǵan júıesiniń derekteri boıynsha Áýezov aýdany, Sátbaev kóshesi №145A, óndiristik ǵımaratqa qyzmet kórsetý úshin ýaqytsha óteýli jer paıdalaný quqyǵy negizinde berilgen.
Bul ýchaskedegi turǵyn emes úı-jaılar (garajdar, sheberhanalar) 2007 jylǵy 1 tamyzdaǵy legalızatsııa komıssııasynyń sheshimimen zańdastyrylǵan.
Qazirgi ýaqytta ishinara buzyldy jáne qaıta qurý men salý boıynsha jumystar bastaldy.
«Atalǵan mekenjaıda úı-jaılardy qaıta qurý jáne salý boıynsha qurylys-montajdaý jumystarynyń bastalǵany týraly habarlama túsken joq, jumys toqtatyldy. Sondaı-aq, menshik ıesi negizgi jer ýchaskesiniń shyǵys jaǵyndaǵy memlekettik jerdi ishnara qorshap alǵan. Túsindirý jumystarynyń nátıjeleri boıynsha bul menshik ıesi múmkindiginshe tezirek jeke basyn kýálandyratyn qujatta kórsetilgen shekaralarǵa sáıkes qorshaýdy jyljytý týraly mindetteme aldy. Sondaı-aq, aǵashtardy kesý josparda joq. Kerisinshe, sanıtarlyq kesý jumystary jergilikti atqarýshy organdar qyzmetkerleriniń qatysýymen 2020 jyldyń qarasha aıynda júrgizilgen» dep habarlady basqarmadan.
