Belsendi jastar barsha qazaqstandyq jas býynǵa úndeý jasady
NUR-SULTAN. QazAqparat - Búgin «Nur Otan» partııasynyń ortalyq apparatynda belsendi jastar bas qosty. Otyrys barysynda elorda ataýynyń ózgerýi týraly oılaryn ortaǵa salyp, tarıhı sátti qýanyshpen qabyldaǵandaryn jetkizdi, dep habarlaıdy QazAqparat.
Belsendi jastardyń basy birikken sharada sóz alǵan «Nur Otan» partııasynyń QR Parlamenti Májilisindegi fraktsııasynyń múshesi Baqtııar Máken:
-Nursultan Nazarbaevtyń 2019 jyldyń 19 naýryzyndaǵy halyqqa joldaǵan úndeýin bárimiz de tyńdadyq. Elbasynyń kez kelgen sheshimi elimizdiń damýyna septigin tıgizetinine senemin jáne saıası mańyzy bar sheshim dep esepteımin. Ult Kóshbasshysy bul qadamǵa qanshama ýaqyt tereń oılana barǵandyǵy aıan. Básekege qabiletti el bolýda Elbasynyń úlesi erek. Nursultan Ábishuly Nazarbaev Qazaqstan Respblıkasynń Táýelsizdiginiń negizin qalaǵan, onyń qaıta jandanýyna eleýli úles qosqan tulǵa retinde sanamyzda máńgi qalady. Esimi altyn árippen tarıhqa jazylýǵa laıyqty tulǵa, - deı kele, jalyndy jastardyń elordanyń Nur-Sultan qalasy bolyp ózgerýi týraly oılaryna qulaq túrdi.
Jastar uıymdarynyń kóshbasshylary óz pikirlerin bildirip jatty. Sonyń biri QR Halyqaralyq «Bolashaq» stıpendııasy stıpendıattary qaýymdastyǵynyń atqarýshy dırektory Laýra Demesinova Elbasynyń qıyndyqqa qaramastan, 26 jyl buryn «Bolashaq» baǵdarlasyn ashyp, on úsh myń qazaqstandyq jastarǵa shet memlekette bilim alýǵa múmkindik bergeni úshin alǵys bildire kele «Biz, bolashaqtyqtar, astananyń ataýy Nur-Sultan qalasyna ózgerýin qoldaımyz!» - dedi. Qazaqstan stýdentteri Alıansynyń Prezıdenti Іlıas Tústikbaev:
«Tarıhı sátke kýá bolyp otyrǵan, táýelsiz eldiń jastarymyz. Biz Elbasynyń salǵan dańǵyl jolymen kelemiz. Nursultan Ábishuly óz sózinde aıtqandaı, jastarǵa úlken senim artty. Sondyqtan, biz, stýdent jastar, bul joldy ári qaraı jalǵastyramyz. Elimizidi damytýǵa bar kúsh-jigerimizdi salamyz. Qazir Astananyń ataýyn ózgertý týraly halyq kóp pikir bildirýde, soǵan qaramastan, biz Nur-Sultan ataýy da bolashaqta jańa brend bolyp qalyptasatynyna senimdimiz», - dep, barsha qazaqstandyq jastar men elordalyqtardy tarıhtyń jańa paraǵynyń ashylýymen quttyqtady.
«Nur Otan» partııasynyń hatshysy Farhat Qýanǵanov jastardyń jyly lebizderin estigen soń, Elbasynyń jastarǵa únemi erekshe mán berip, senim artyp júretindiginiń esh ketpegendigine qýandy dep atap ótti.
"Elbasynyń eńbegi týraly kóp oı aıtylýda. Ásirese, Astana qalasynyń qalanýynda onyń úlesi aıryqsha boldy. Elordanyń Nur-Sultan bolyp jańa atqa ıe bolýy - eldiń ári qaraı Elbasynyń salǵan jolymen júretindiginiń aıǵaǵy bolmaq. Adamzat balasy, árıne, jańalyqqa tez úırene bermeıdi. Bul áreket saıası turǵyda tereń taldanyp jasalǵan oıdyń sátti nátıjesi. Búgingi otyrysta tarıhı mańyzdy is jasaýdamyz. Óz bolashaǵymyzǵa tańdaý jasaımyz", - dedi.
Qazaqstan Respýblıkasy tuńǵysh Prezıdentiniń esimi qazaq halqynyń jadynda máńgi saqtalatynyn tilge tıek etken Qazaqstan Halqy assambleıasynyń múshesi Maksım Spotkaı Elbasynyń tek táýelsizdigimizdi qalaýda ǵana emes, ony saqtaýda, nyǵaıtýda da mańyzdy ról atqarǵandyǵyna toqtaldy.
-Qazirgi tańda jastardyń aldynda turǵan basty maqsat - Elbasy salǵan baǵytty saqtap qalý, saıasatyn ári qaraı jalǵastyrý. Elordamyzdyń Nur-Sultan bolyp ózgerýin tarıhı sheshim dep qabyldaý kerek. Onyń róli álem arenasynda astanamyzdyń ımedjin qalyptastyrýda, damytýda erek bolady. Bul táýelsiz Qazaqstan jastarynyń atynan Elbasyǵa jasalǵan qurmet nyshany bolady dep sanaımyn, - dedi Maksım Spotkaı.
Sondaı-aq, jastar N. Á. Nazarbaev Prezıdenttik ókilettiligin toqtatqanmen, Qaýipsizdik Keńesiniń Tóraǵasy, «Nur Otan» partııasynyń Tóraǵasy, Qazaqstan halqy Assambleıasynyń tóraǵasy, Konstıtýtsııalyq Keńestiń múshesi retinde óz qyzmetin, elimizdiń damýyna odan ári óz úlesin qosýyn jalǵastyra beretinine senim artty.
Oılary bir arnada toǵysqan jastar uıymdarynyń jetekshileri men jas kóshbasshylar otyrys sońynda qazaqstandyq jastarǵa úndeý jasap, jas qazaqstandyqtardy táýelsiz Qazaqstannyń Tuńǵysh Prezıdenti aıqyndaǵan strategııalyq baǵytqa qoldaý kórsetýde birlik, tatýlyq pen kelisim tanytýǵa shaqyrdy.
Jıynǵa «Nur Otan» partııasynyń «Jas Otan» JQ, QR Halyqaralyq «Bolashaq» stıpendııasy stıpendıattarynyń qaýymdastyǵy, Qazaqstan jastarynyń kongresi, Qazaqstan stýdentter alıansy, «Jas Ulan» birińǵaı balalar men jasóspirimder uıymy, «Jasyl el» jastar eńbek jasaqtary, Qazaqstan halqy Assembleıasynyń «Jańǵyrý joly» respýblıkalyq jastar qozǵalysy, Qazaqstan KVN Odaǵy, QR Ulttyq Delfıı komıteti, Nur-Sultan q. Jastar resýrstyq ortalyǵy, Ulttyq eriktiler jelisi, «Qazaqstan-2050» Jalpyulttyq qozǵalysynyń ókilderi qatysty.
