Belsendi uzaq ómir súrý ortalyqtary zeınetkerler arasyndaǵy jalǵyzdyqty 55%-ǵa azaıtqan - zertteý
ALMATY. KAZINFORM – Almatyda Belsendi uzaq ómir súrý ortalyqtary qalaı jumys istep jatyr? Bul suraqqa Ortalyq dırektory Sáýle Beketaeva jaýap berdi.
Onyń aıtýynsha, Almatyda 2018 jyly elimiz boıynsha alǵashqy Belsendi uzaq ómir súrý ortalyǵy ashylǵan. Qazirgi tańda qalada 21 ortalyq jumys isteıdi. Onyń 17-si memlekettik áleýmettik tapsyrys aıasynda qoǵamdyq uıymdardyń bazasynda qyzmet kórsetip júr.
- Jobanyń negizgi maqsaty – aǵa býyn ókilderiniń belsendi, salaýatty jáne sapaly ómir súrýine jaǵdaı jasaý, olardyń áleýmettik belsendiligin saqtap, qala ómirine belsendi aralasýyn qamtamasyz etý, – dedi Sáýle Beketaeva.
Ol búginde Belsendi uzaq ómir súrý ortalyqtarynyń qyzmetin 18 myńnan astam zeınetker paıdalanyp otyrǵanyn atap ótti. Ortalyqtar ashylǵaly beri 222 myńnan astam túrli qyzmet kórsetilgen. Olardyń qatarynda bilim berý, mádenı jáne saýyqtyrý baǵdarlamalaryna qoljetimdilik qamtamasyz etilgen.
- Júrgizilgen zertteýler nátıjesinde joba qatysýshylary arasyndaǵy kúızelis deńgeıi 50 paıyzǵa, al jalǵyzdyq sezimi 55 paıyzǵa tómendegen. Sondaı-aq kelýshilerdiń 70 paıyzdan astamy densaýlyq jaǵdaıynyń, emotsıonaldyq kóńil kúıiniń jáne áleýmettik belsendiliginiń jaqsarǵanyn atap ótti, - dedi ol.
Aıtýynsha, ortalyqqa kelýshiler arasynda emdik deneshynyqtyrý, ıoga, gımnastıka, bı, hor áni, sýret salý, qolóner úıirmeleri, sondaı-aq kompıýterlik jáne tsıfrlyq saýattylyq kýrstary erekshe suranysqa ıe. Odan bólek Belsendi uzaq ómir súrý ortalyqtarynyń bı ujymdary birneshe ret Gran-prı ıegeri atanyp, halyqaralyq baıqaýlardyń laýreattary bolǵan.
- Mańyzdy jetistikterdiń biri – Almaty tájirıbesiniń halyqaralyq deńgeıde moıyndalýy. 2025 jyly qalalyq Belsendi uzaq ómir súrý ortalyǵy 17 eldiń sarapshylaryn biriktirgen forým ótkizdi, - dep atap ótti Sáýle Beketaeva.
Eske salaıyq, buǵan deıin Belsendi uzaq ómir súrý ortalyqtarynda zeınetkerlerge qandaı qyzmetter tegin kórsetiletinin jazǵanbyz.
