Belgisizder zıratyna jerlengen aqtóbeliktiń jaqyndary polıtsııadan moraldyq shyǵyn ótep aldy
AQTÓBE. KAZINFORM – Aqtóbede sýǵa ketip kóz jumyp, keıin eki aıdan astam máıithanada jatqan, belgisizder zıratyna jerlengen Aman Jaqaevtiń anasy men qaryndasyna polıtsııa moraldyq shyǵyn tóleıdi. Árqaısysyna 300 myń teńge berýi tıis.
Aqtóbe qalalyq sotynda marqum Aman Jaqaevtiń anasy men qaryndasynyń shaǵymy boıynsha QR Qarjy mınıstrliginen, Aqtóbe oblystyq polıtsııa departamentinen moraldyq zııandy óndirý týraly azamattyq isi qaraldy. Іs materıalyna súıensek, aqtóbelik 2024 jyldyń 16 maýsymynda Qarǵaly ózenine batyp ketken. Aqtóbe qalalyq polıtsııa basqarmasy sotqa deıingi tergep-tekserýdi bastap, máıitti qaraǵannan keıin oqıǵa týraly onyń jaqyn týystaryna habarlamaǵan. Onyń denesin eki aı máıithanada ustap, 2024 jyldyń 6 qyrkúıeginde belgisizder zıratyna jerlengen. Al týǵan-týystary bul týraly 2024 jyldyń 9 kyrkúıegi kúni bilgen. Talap qoıýshylar Aqtóbe oblystyq polıtsııa departamenti men Qarjy mınıstrliginiń árqaısynan 2 000 000 teńge kóleminde moraldyq zııan retinde ótemaqyny óndirýdi suraǵan.
- Sot talap qoıýshylardyń óz jaqyn týysyn jer qoınyna tapsyrý, joqtaý saltyn ustanyp, kádesin jasaý múmkindiginen aıyrýdy moraldyq zııan shekken dep sanady. Sottyń sheshimimen Aqtóbe oblystyq polıtsııa departamentinen ár talap qoıýshynyń paıdasyna 300 000 teńgeden óndirdi. Sot sheshimi zańdy kúshine engen joq,- dep habarlady Aqtóbe qalalyq sotynyń baspasóz qyzmeti.
Eske salsaq, belgisizder zıratyna jerlengen Aman Jaqaevtiń anasy men qaryndasy sot arqyly polıtsııa departamentinen 4 mln teńge moraldyq zalal talap etti.