Belgisizder zıratyna jerlengen aqtóbeliktiń anasy men qaryndasy polıtsııadan moraldyq shyǵyn talap etti
AQTÓBE. KAZINFORM – Aqtóbede 2 aıdan astam ýaqyt boıy máıithanada jatyp qalyp, keıin belgisizder zıratyna jerlengen Aman Jaqaevtiń anasy men qaryndasy sotqa júgindi. Olar polıtsııa departamentinen 4 mln teńge moraldyq zalal talap etti.
Aqtóbedegi sotta marqum Aman Jaqaevtiń anasy men qaryndasynyń aryzy boıynsha is qaraldy. Talapker Aıtýǵan Imanǵalıevtiń aıtýynsha, byltyr maýsym aıynda balasy Aman Jaqaev sýǵa ketip mert bolǵan. Al onyń otbasy bul týraly múlde bilmegen.
- Jazda balam saıajaıǵa ketti. Anda-sanda kelip turatyn edi. Birde joq bolyp ketti. Qyzyma polıtsııaǵa bar dep aıttym. Bir kúni qyzym Janat jylap keldi, aǵam qaıtyp qaldy dep. Biz 90 kúnge taqaǵanda bilip, sadaqa berdik. Ony 6 qyrkúıek kúni belgisizder zıratyna jerlegen. Balamnyń zıratyn nómirmen taptyq. Balam ózi turatyn, úılenbegen. Jóndeý jumystaryn júrgizdi, aqqóńil edi, - dedi Aıtýǵan Imanǵalıev.
Otbasynyń qorǵaýshysy Ǵalymjan Akbarovtyń aıtýynsha, birinshiden, Іshki ister organdary ýaqytyly habar bermedi. Ekinshiden, múrde máıithanada 2 aıdan astam ýaqyt jatyp qalǵan. Úshinshiden, ony belgisizder zıratyna jerlegen. Osy ýájdi alǵa tartqan otbasy polıtsııadan moraldyq shyǵyn talap etti.
- Talapkerler ózderiniń quqyǵy jerge taptalǵanyn aıtyp otyr. Qaıtys bolǵan kúnniń ózinde mindetti túrde ony arýlap jerleıdi ǵoı. Bul jerde jetisi, qyrqy, júzin ótkize almady. Polıtsııa departamentine qatysty talap aryz berilip jatyr. Moraldyq zalal suralady. Sot quqyqtyq baǵasyn beredi, - dedi qorǵaýshy.
Sot otyrysyna qatysqan Aqtóbe oblystyq PD ókili, eki polıtsııa qyzmetkeriniń kinási qyzmettik tekserý kezinde anyqtalǵanyn, olar laýazymdarynan bosatylǵanyn aıtty.
- Ýchaskelik polıtsııa qyzmetkerleriniń mindeti – aldyn alý. Senip tapsyrylǵan múlikti qorǵaý, ózine bekitilgen ákimshilik aýmaqtaǵy turǵyndardyń hál-jaıyn bilip otyrý. Aman Jaqaev 2019 jyldyń naýryz aıyna deıin Almaty oblysynda tirkelgen. 2019-2024 jyldar aralyǵynda esh jerde tirkelmegen. 2024 jyly Jaqaevqa qatysty birneshe ákimshilik materıal toltyrylǵan. Onyń ekeýi qaryndasynan tústi. Degenmen eki qyzmetker de qaı jerde turatynyn bile tura habarlamaǵanyn moıyndady. Ózderine qatysty tártiptik sharamen kelisip otyr. Atqaryp otyrǵan qyzmetinen bosatyldy ekeýi de. Aıtýǵan apaıǵa, Janatqa moraldyq zııan keltirgenin túsinemiz. Jedel ýákil bastyǵyna «týystary kóme almaıdy» dep qol qoıdyryp alǵan. Biz azamattyq turǵydan bul kisilerge moraldyq zııan keltirmedik dep aıta almaımyz. Alaıda PD resmı ustanymy boıynsha talap aryzdaǵy mán-jaılarmen kelispeımiz, - dedi oblystyq PD ókili.
Eske salsaq, Aqtóbe qalasynda polıtsııa qyzmetkeriniń denesi turǵylyqty mekenjaıynan tabyldy.