Belgisiz nysandar Astana aspanynda ushyp ótti

ASTANA. KAZINFORM -  Astana turǵyndary aspandaǵy «tylsym» jaryqtardy vıdeoǵa túsirip aldy.

Turǵyndar túsirilgen beınejazbalardy áleýmettik jelilerde jarııalady.

Tsıfrlyq damý, ınnovatsııalar jáne aeroǵarysh ónerkásibi mınıstrligi tıisti qyzmettermen birlesip taldaý júrgizilip, túsinikteme beriletinin aıtty.

— Astana aspanynda baıqalǵan qubylys týraly aqparatty tekserip jatyrmyz. Tıisti qyzmettermen birlesip taldaý júrgiziledi. Resmı túsinikteme beriledi, — delingen Tsıfrlyq damý, ınnovatsııalar jáne aeroǵarysh ónerkásibi mınıstrligi habarlamasynda.

Qorǵanys mınıstrligi bolsa azamattardan sabyr saqtaýdy jáne rastalmaǵan aqparat taratpaýdy ótindi.

— Qazaqstan Respýblıkasy aýmaǵynda áýe keńistiginiń buzylý faktileri tirkelgen joq. Jaǵdaı tıisti qyzmetterdiń tolyq baqylaýynda. Halyqqa eshqandaı qaýip tónip turǵan joq.

Atalǵan qubylys atmosferaǵa enip jatqan ǵaryshtyq apparattardyń qaldyqtaryna nemese meteor aǵynyna uqsaıdy. Mundaı nysandar, ádette, atmosferanyń tyǵyz qabattarynda janyp ketip, jerge jetpeıdi.

Azamattardan sabyr saqtaýdy jáne rastalmaǵan aqparat taratpaýdy suraımyz. Quzyrly organdar bul qubylysty zerttep jatyr jáne qajet bolǵan jaǵdaıda resmı túsinikteme beredi, — delingen Qorǵanys mınıstrligi habarlamasynda.