Belgisiz bireýler Germanııadaǵy Býndesverden 20 myń oq-dári urlap ketken

ASTANA.KAZINFORM — Germanııada belgisiz bireýler Býndesverge tıesili oq-dárilerdi urlap ketti. Oqtar azamattyq kólik kompanııasyna tıesili júk kóliginen urlanǵan, dep habarlaıdy DW. 

Bonndaǵy Býndesverdiń kómekshi bólimshesiniń ókili oqıǵanyń 25 qarasha túninde bolǵanyn málimdedi. Onyń aıtýynsha, júk kóligi túni boıy turaqta turǵan, al buzyp kirý tek kelesi kúni, júrgizýshi kazarmadaǵy nemis áskerlerine oq-dári jetkizý úshin kelgende ǵana anyqtalǵan.

Bastapqy baǵalaý boıynsha, urylar shamamen 10 myń 9 mm kalıbrli oq-dárini, shabýyl myltyqtaryna arnalǵan 9 900-ge jýyq bos oq-dárini jáne tútin shashatyn granatalardy urlap ketken.

— Biz bul urlyqty óte qaýipti dep sanaımyz, sebebi mundaı oq-dáriler bóten qolǵa túspeýi kerek, — dedi Germanııa Qorǵanys mınıstrliginiń ókili.

Onyń aıtýynsha, Býndesvermen kelisimshart jasasqan kólik kompanııasy oq-dárilerdi tasymaldaý kezinde qaýipsizdik erejelerin buzǵan. Shamasy, júrgizýshi júkti ónerkásiptik aımaqtaǵy kúzetilmegen turaqta qaraýsyz qaldyryp, qonaq úıde túneýdi sheshken. Býndesver bul kezdeısoq urlyq emes dep sanaıdy, qylmyskerler kólikti ańdyp júrgen.

Buǵan deıin Nıderlandtaǵy murajaıda jarylystan keıin kóne altyn dýlyǵa urlanǵany habarlanǵan bolatyn.