Belgradta sherýshiler ákimshilik ǵımaratyn basyp alýǵa tyrysýda
«Serbııa zorlyq-zombylyqqa qarsy» oppozıtsııalyq blogynyń jaqtastary osy sátte Belgradta qala ákimshiliginiń ǵımaratyna kúshpen kirýge árekettenip jatyr. Bul týraly TASS tilshisi oqıǵa ornynan málim etýde, dep habarlaıdy Kazinform.
Atalǵan oppozıtsııalyq blogtyń jaqtastary Belgrad ortalyǵynda ornalasqan Respýblıkalyq saılaý komıssııasy ǵımaratynyń janynda 18 jeltoqsan kúni keshke mıtıngiler serııasyn bastaǵan bolatyn.
Búgin demonstranttar jergilikti ákimshiliktiń esigin flagshtoktyń kómegimen buzyp, tastar men syranyń temir bankilerin laqtyryp, terezelerdi syndyrdy.
El prezıdenti Aleksandar Výchıch halyqqa shuǵyl úndeý jasap, qala ákimshiligi ǵımaratyn basyp alý áreketteri revolıýtsııa bolyp tabylmaıtynyn jáne quqyq qorǵaý organdary jaǵdaıdy baqylaýda ustap turǵanyn málimdedi.
«Serbııa azamattary, sizderge aıtarym, kórinister úıreıli bolǵanymen, ýaıymdamańyzdar. Eshqandaı revolıýtsııa bolyp jatqan joq, olardyń áreketteriniń birde-biri iske aspaıdy jáne biz baıypty, beıbit reaktsııa kórsete otyryp, kezdeısoq demonstranttarǵa kesiri tıip ketpeýin baqylaýdamyz», - dedi ol.
Sondaı-aq TASS-tyń jazýynsha, ákimdik ǵımaratyna kirýge kezekti ret talpynǵan narazylyq bildirýshiler tobyna qarsy polıtsııa kóz jasaýratatyn gaz qoldandy.
Eske salaıyq, 17 jeltoqsan kúni Serbııa parlamentine kezekten tys saılaý ótip, onda is basyndaǵy prezıdent Aleksandr Výchıchtiń koalıtsııasy jeńiske jetti. Baıqaýshylar saılaý zańsyz ótkenin aıtýda. Al oppozıtsııa mıtıngiler ótkizýge kóshti.
