Belgradta prezıdent Výchıchtiń úkimetine qarsy narazylyq sharalary ótti

ASTANA. KAZINFORM – Senbi kúni Belgradta ondaǵan myń adam jappaı mıtıngke jınaldy. Bul jolǵy mıtıng Serbııa prezıdenti Aleksandr Výchıchtiń úkimetine qarsy narazylyq sharalarynyń sharyqtaý shegi boldy, dep habarlaıdy Euronews.

Jańbyr jaýyp turǵanyna qaramastan týlaryn ustaǵan demonstranttar el astanasynyń alańyna tolyp, adamdardyń qımyldaýynyń ózi qıynǵa soqty. Kópshiligi aktsııa ótetin orynǵa jete almaı qaldy.

Narazylyq bildirýshiler qalanyń ár aımaǵyndaǵy kelisilgen birneshe alańǵa jınaldy. Ol oryndar joǵary daıyndyq rejımine kóshirilip, qoǵamdyq kólik qozǵalysyna tyıym salyndy.

Narazylyq sharalary óterdiń aldynda Výchıch tártipsizdikter bolýy múmkindigin aıtyp, oǵan qatysýshylar tutqyndalyp, qatań sharalar qoldanylýy múmkindigi týraly eskertti.

Tórt aıdan astam ýaqyt boıy jalǵasqan sybaılas jemqorlyqqa qarsy narazylyqtardan keıin ótip jatqan bul mıtıng Balqan elinde úkimetke qarsy baǵyttalǵan eń iri aktsııalardyń biri boldy jáne ol mınıstr, premer-mınıstr jáne prezıdent laýazymdarynda 13 jyl boıy bılikti ýysynan shyǵarmaı kele jatqan Výchıch úshin aıtarlyqtaı qaýip edi.

Narazylyq bildirýge shyqqan stýdentter 1 qarashada Serbııanyń soltústigindegi Novı-Sade qalasynda temirjol stantsııasynda beton bastyrma qulap, 15 adam qurban bolǵannan keıin bastalǵan jemqorlyqqa qarsy jalpyulttyq qozǵalysty bastady.

Serbııa halqynyń basym kópshiligi buny jemqorlyqqa belshesinen batqan úkimettiń, óz isine nemquraıdy qaraý, qurylys salasynyń qaýipsizdik erejesin saqtamaýdyń saldary dep biledi.