Belgili vırýsolog, birneshe otandyq vaktsınanyń avtory ómirden ozdy
ASTANA. KAZINFORM – Belgili ǵalym, Bıologııalyq qaýipsizdik problemalary ǵylymı-zertteý ınstıtýty «Іndettik aýrýlardyń profılaktıkasy» zerthanasynyń professory Jaılaýbaı Qydyrbaev ómirden ótti.
Bul týraly Bıologııalyq qaýipsizdik problemalarynyń ǵylymı-zertteý ınstıtýtynan málim etti.
2024 jylǵy 27 sáýirde, 77-ge qaraǵan shaǵynda eldegi vırýsologııa, epızootologııa, patologııalyq anatomııa salalaryna jáne vaktsına preparattaryn óndirýdi uıymdastyrýǵa, úı qustary men aýyl sharýashylyǵy janýarlarynyń qaýipti vırýstyq aýrýlaryna qarsy kúreske zor úles qosqan kórnekti ǵalym, professor Qydyrbaev Jaılaýbaı Qydyrbaıuly qaıtys boldy.
«Instıtýt ujymy «Іndettik aýrýlardyń profılaktıkasy» zerthanasynyń professory Qydyrbaev Jaılaýbaı Qydyrbaıulynyń qaıtys bolýyna baılanysty orny tolmas aýyr qaıǵysyna ortaqtasyp, kóńil aıtady», - delingen qaraly habar mátininde.
Ómiri ǵylym men ustazdyqqa arnaǵan J.Qydyrbaev 1996 jyldan bastap bıologııalyq qaýipsizdik problemalarynyń ǵylymı-zertteý ınstıtýtynda jumys istegen. Onyń ishinde 15 jyldan astam ýaqyt boıy Іndettik aýrýlardyń aldyn alý zerthanasyn basqardy.
200-den astam ǵylymı eńbekterdiń avtory, onyń ishinde 36-sy joǵary reıtıngti halyqaralyq jýrnaldarda jarııalanǵan. Onyń esimi ǵylymı ortaǵa 37 ónertabystyń jáne 24 normatıvtik vaktsına qujattarynyń teńquqyqty avtory retinde belgili.
Ǵalym úı qustary men aýyl sharýashylyǵy janýarlarynyń qaýipti vırýstyq aýrýlaryna qarsy vaktsınalardy, onyń ishinde A/H5N1 Kazfluvac jáne A/N1N1 Refluvac pandemııalyq tumaýyna, Qazaqstan Respýblıkasynyń Densaýlyq saqtaý salasyna arnalǵan Kazfluvir maýsymdyq tumaýyna qarsy vaktsınalardy daıyndaý tehnologııalaryn ázirleýge arnalǵan nysanaly respýblıkalyq ǵylymı-tehnıkalyq baǵdarlamalardyń birqatar jobasyna jetekshilik etti. Atalǵan vaktsınalar Qazaqstan, Reseı ǵylymı ortalyqtarynda klınıkaǵa deıingi jáne klınıkalyq synaqtardan sátti ótip, QR DSM-de tirkeýge alyndy.
Keıingi jyldary iri qara, usaq mal jáne adam brýtsellezine qarsy vektorlyq vaktsınalardy ázirleýge aıtarlyqtaı úles qosty.
Jaılaýbaı Qydyrbaıuly 2019 jyly «Qurmet» ordenimen, QR BǴM «Qazaqstan Respýblıkasynyń ǵylymyn damytýdaǵy sińirgen eńbegi úshin» tósbelgisimen, «Eńbek ardageri» medalimen (2016) marapattalǵan, «Ǵylym kóshbasshysy» táýelsiz syılyǵynyń laýreaty (Thomson Reuters).
