Tanymal telejýrnalıst Tileýqabyl Myńjasar dúnıeden ótti
ASTANA. KAZINFORM — Tanymal telejýrnalıst, otandyq televızııanyń ardageri, tanymal telejýrnalıst, Qazaqstan Jýrnalıster odaǵynyń laýreaty Tileýqabyl Myńjasar dúnıeden ótti. Qaraly habardy jýrnalıst Rınat Kertaev jetkizdi.
— Otandyq televızııanyń ardaqty ardageri, uzaq jyldar boıy «Habar» agenttiginiń Almaty oblysyndaǵy menshikti tilshisi bolǵan Tileýqabyl Myńjasar aǵamyzdyń dúnıeden ótkenin estip, qabyrǵamyz qaıysty, — dep jazdy Rınat Kertaev.
Onyń aıtýynsha, Tileýqabyl Myńjasar jýrnalıstıkany qyzmet emes, ómiriniń máni dep túsingen azamat bolǵan.
— Tileýqabyl aǵa — jýrnalıstıkany qyzmet emes, ómiriniń máni dep túsingen azamat edi. Ózi bir suhbatynda: «Men mamandyǵymdy jan-tánimmen jaqsy kórdim» degen bolatyn. Ol úshin úlken-kishi sıýjet bolmady: «Men úshin TV sıýjettiń úlken-kishisi joq. Árqaısysynyń mańyzy zor boldy», – deıtin. Al óz kásibı jolyn bir aýyz sózben: «40 jyldan astam… Tilshi ǵana boldym», – dep sıpattaǵan. Osy «tilshi ǵana boldym» degen sózdiń ózinde úlken taǵdyr jatyr. Ol Almaty oblysynyń aýyl-aımaǵyn aralap, qarapaıym halyqtyń máselesin respýblıkalyq efırge jetkizdi, — dedi ol.
Tileýqabyl Myńjasar Túrkistan qalasynda týǵan. 1975 jyly ál-Farabı atyndaǵy Qazaq ulttyq ýnıversıtetiniń jýrnalıstıka fakýltetin bitirgen.
1975 jyly Qazaq jasóspirimder televıdenıesinde alǵashqy habary efırge shyqty. «Habar» agenttiginde qurylǵan kúnnen bastap jumys istedi.
«Eńbekte úzdik shyqqany úshin» medalimen, Qazaqstan Prezıdentiniń Alǵys hatymen marapattalǵan. Qazaqstan jýrnalıster odaǵynyń laýreaty, Almaty oblysynyń qurmetti azamaty. «Habar» agenttiginiń «Altyn mıkrofonynyń» ıegeri.
Eske salaıyq, buǵan deıin otandyq baspa isiniń ardageri Almıra Sýjıkova dúnıeden ótkenin jazǵan edik.
