Belgili sport jýrnalısi ári kommentator Ǵalym Súleımen ómirden ozdy
ASTANA. KAZINFORM – Belgili qazaqstandyq sport jýrnalısi, kommentator Ǵalym Súleımen 51 jasyna qaraǵan shaǵynda kenetten ómirden ozdy, dep habarlaıdy INFORMSPORTS.
Ǵalym Qamashuly eńbek jolyn 1994 jyly «Órken-Gorızont» gazetinde bastap, 1996–2004 jyldary «Egemen Qazaqstan» gazetinde sport sholýshysy qyzmetin atqardy. 2004 jyly «Sports&kz» gazetiniń bas redaktory bolyp taǵaıyndaldy. Keıin «Aiqyn» respýblıkalyq gazetinde eńbek etip, «Beren» sport jýrnalynyń jumysyna atsalysty.
Ómiriniń sońyna deıin «Egemen Qazaqstan» gazetinde jýrnalıstik qyzmetin jalǵastyryp, YouTube jelisindegi «Beren/Beren live» arnasy arqyly otandyq sportty keńinen nasıhattady. Sondaı-aq qazaq televızııasynda kóptegen sporttyq jarysty júrgizip, kásibı kommentator retinde kópshilikke tanyldy.
Ǵalym Qamashulynyń qazaq sport jýrnalıstıkasyn damytýǵa qosqan úlesi laıyqty baǵalandy. Ol Qazaqstan Respýblıkasy Prezıdentiniń buqaralyq aqparat quraldary salasyndaǵy syılyǵynyń stıpendıaty, «Eren eńbegi úshin» medaliniń ıegeri, Seıdahmet Berdiqulov atyndaǵy syılyqtyń eki dúrkin laýreaty boldy.
Sportsúıer qaýym onyń daýysyn Nagano, Sıdneı, Vankýver jáne London Olımpıadalaryndaǵy, sondaı-aq boks pen kúres básekelerindegi jarqyn reportajdary arqyly jaqsy tanıdy.
Jýrnalıstiń áriptesteri men jaqyndary onyń kenetten júregi toqtap qaıtys bolǵanyn jetkizdi.
