Belgili qalamger Adolf Artsıshevskıı ómirden ozdy
ASTANA. KAZINFORM — Qazaqstannyń mádenı jáne ádebı keńistiginde óshpes iz qaldyrǵan jazýshy, aqyn, jýrnalıst, aýdarmashy, qoǵam qaıratkeri Adolf Artsıshevskıı 87 jasynda dúnıeden ótti, dep habarlaıdy Mádenıet jáne aqparat mınıstrliginiń baspasóz qyzmeti.
— Ol óz shyǵarmashylyǵynda adamgershilik, rýhanııat pen týǵan jerge degen súıispenshilik taqyryptaryn tereń qozǵap, birneshe býyn oqyrmanǵa oı saldy. Onyń qalamynan týǵan týyndylar qazaq jáne orys tilderinde jaryq kórip, ádebı qaýymdastyqtyń joǵary baǵasyna ıe boldy, — delingen mınıstrliktiń habarlamasynda.
Adolf Alfonsovıch Artsıshevskıı 1938 jyldyń 17 qańtarynda Prokopevs (Kýzbass) qalasynda dúnıege kelgen. Ómiriniń basym bóligin Almaty qalasynda ótkizdi.
Ol 1960 jyly QazMÝ-diń jýrnalıstıka fakýltetin, al 1981 jyly Máskeýdegi M. Gorkıı atyndaǵy Ádebıet ınstıtýty janyndaǵy Joǵary ádebı kýrstardy támamdaǵan.
Eńbek jolyn «Jazýshy» baspasynda redaktor bolyp bastaǵan. Sonymen qatar «Prostor» jýrnalynda tehnıkalyq redaktor, Respýblıkalyq jas kórermender teatrynda jáne M. Lermontov atyndaǵy akademııalyq orys drama teatrynda ádebı bólimniń meńgerýshisi qyzmetterin atqardy.
Sondaı-aq ol «Qazaqfılm» stýdııasynda túsirilgen alǵashqy qazaqstandyq telehıkaıa — «Burylystyń» bas redaktory, ári «Jańa dáýir» jýrnalynyń bas redaktory bolǵan.
Adolf Artsıshevskıı poezııa jáne prozanyń 18 kitabynyń avtory. Ol — Qazaqstan Jazýshylar odaǵynyń, PEN-klýbtyń, Jýrnalıster odaǵynyń, Teatr qaıratkerleri odaǵy men Kınematografıster odaǵynyń múshesi.
Sonymen qatar ol qazaq ádebıetin orys tiline aýdarýda eleýli eńbek sińirdi. Atap aıtqanda, Ákim Tarazıdiń «Aıaz ben Oraz», «Dınastııa» povesterin, Baqqoja Muqaıdyń «Aqqý» povester jınaǵyn, Qalıhan Ysqaqovtyń «Belovode jeriniń ańyzy» romanyn, Qalıhan Ysqaqov pen Shahımarden Qusaıynovtyń «Buıryq kúshinde qalady» pesasyn jáne Dýlat Isabekovtiń «Іbilistiń tory (Mıhaıl Býlgakovtyń ómiri)» pesasyn orys tiline aýdarǵan.
Buǵan deıin mamyrda tanymal sport jýrnalısi, BAQ salasynyń belgili ókili Dıas Ahmetshárip 49 jasynda ómirden ótkenin jazǵanbyz.