Aqtóbe oblystyq densaýlyq saqtaý basqarmasyna jańa basshy keldi
AQTÓBE. KAZINFORM — Birneshe jyl hırýrg, oblystyń bas hırýrgi bolǵan Erlan Sultangereev endi Aqtóbe oblystyq densaýlyq saqtaý basqarmasyn basqaratyn boldy.
Aqtóbe oblysynda taǵy da kadrlyq aýys-túıis boldy. Búgin QR Memlekettik qyzmet isteri agenttigi jáne QR Densaýlyq saqtaý mınıstrliginiń kelisimimen Aqtóbe oblysy densaýlyq saqtaý basqarmasynyń basshysy bolyp Erlan Baqytuly Sultangereev taǵaıyndaldy.
Ol 1980 jyly Aqtóbe oblysynda dúnıege kelgen. 2003 jyly Marat Ospanov atyndaǵy Batys Qazaqstan memlekettik medıtsına akademııasyn «Emdeý isi», 2013 jyly Astana medıtsına ýnıversıtetin «Medıtsına» mamandyqtary boıynsha támamdaǵan. Medıtsına ǵylymdarynyń doktory.
— Eńbek jolyn 2004 jyly Jedel medıtsınalyq járdem aýrýhanasynyń hırýrgııa bóliminde dáriger-hırýrg bolyp bastaǵan. 2010 jyly osy mekemede dáriger-ordınator laýazymyna aýystyrylǵan. 2017-2018 jyldary Aqtóbe medıtsınalyq ortalyǵynyń bas dárigerdiń hırýrgııalyq qyzmet jónindegi orynbasary; 2018-2020 jyldary Aqtóbe medıtsınalyq ortalyǵynyńbalalar statsıonarynyń medıtsınalyq dırektory qyzmetterin atqarǵan. 2020 jyldyń qazan aıynan bastap 2024 jyldyń tamyz aıyna deıin Aqtóbe medıtsınalyq ortalyǵynyń bas dárigeri qyzmetinde boldy, — dep habarlady Aqtóbe oblysy ákiminiń baspasóz qyzmeti.
Eske salsaq, buǵan deıin Aqtóbe oblystyq jumyldyrý daıarlyǵy, aýmaqtyq qorǵanys jáne azamattyq qorǵaý basqarmasyna Temirjan Bólteev taǵaıyndaldy.