Belgili ánshi Gúlzıra Bókeıhan dúnıeden ótti

ASTANA. KAZINFORM — Qazaqstan Respýblıkasynyń eńbek sińirgen qaıratkeri, tanymal ánshi Gúlzıra Bókeıhan ómirden ozdy. Qaraly habardy Dúnıejúzi qazaqtarynyń qaýymdastyǵy estirtti. 

Gúlzıra Bókeıhan 1969 jyly Qytaı Halyq Respýblıkasynyń Shyńjań uıǵyr avtonomııalyq aýdanyndaǵy Altaı óńirinde dúnıege kelgen. Mýzykaǵa erte jastan den qoıǵan ol kásibı vokal ónerinde ózindik baǵyty men oryndaýshylyq mánerin qalyptastyrdy.

Óner jolyndaǵy alǵashqy qadamyn 1983 jyly Іle oblystyq óner kolledjinde bastaǵan. Atalǵan oqý ornyn 1986 jyly támamdap, eńbek jolyn Іle oblystyq Qazaq án-bı teatrynda jalǵastyrdy. Keıin 1988–1993 jyldary Beıjiń ulttyq ýnıversıtetiniń mýzyka fakýltetinde vokal mamandyǵy boıynsha bilim alyp, joǵary bilim ıesi atandy.

1999 jyly tarıhı otanyna oralyp, Qurmanǵazy atyndaǵy Qazaq ulttyq konservatorııasynyń aspırantýrasyna qabyldandy. Ol jerde KSRO halyq ártisi Roza Jamanovanyń jetekshiligimen bilimin jetildirip, 2001 jyly oqýyn aıaqtady.

Odan keıingi jyldary Gúlzıra Bókeıhan elordada eńbek etip, Astana memlekettik fılarmonııasy men Prezıdenttik mádenıet ortalyǵynda ánshi qyzmetin atqardy. Halyqaralyq jáne respýblıkalyq baıqaýlardyń laýreaty atanǵan óner ıesi qazaq vokal mektebiniń damýyna súbeli úles qosty, jas oryndaýshylarǵa tálim-tárbıe berdi.

Eske sala keteıik, kıno jáne teatr akteri, rejısser, pedagog, professor, Qazaq KSR jáne KSRO halyq ártisi Asanáli Áshimov 88 jasynda ómirden ótken edi.