Belgili akter, teatr rejısseri Orazhan Kenebaev ómirden ótti

ASTANA. KAZINFORM – Qazaqstannyń eńbek sińirgen qaıratkeri, «Qurmet» ordeniniń ıegeri, Muhtar Áýezov atyndaǵy Qazaq ulttyq teatrynyń qoıýshy- rejısseri Orazhan Sádýaqasuly Kenebaev dúnıeden ozdy. Bul týraly Mádenıet jáne aqparat mınıstrliginiń baspasóz qyzmeti habarlady. 

Orazhan Sádýaqasuly Kenebaev – 1950 jyly 16 naýryzda Taldyqorǵan oblysy, Andreev aýdany, Tóńkeris aýylynda týǵan. Qazaqstannyń eńbek sińirgen qaıratkeri, «Qurmet» ordeniniń ıegeri ataqtaryn alǵan.

«Abaı» (Orazbaı), «Abylaı han» (Qaldan sheri, Orys elshisi), «Revızor» (Dýanbasy), «Tomırıs» (Balhash), «Qamar sulý» (Omar), «Mahabbattyń ǵajap áni» (Qojaq), «At jylaǵan tún» (Tóraǵa), «Qudalar» (Momyn), «Móldir mahabbat» (Ábýtálip) jáne basqa da spektaklderde oınady.

«Mosfılm» kınostýdııasynyń «Dıvızııa komandıriniń kúni» (Barlaýshy), «Qazaqfılm» kınostýdııasynyń «Álııa» (Soldat), «Ótelmegen qaryz» kınofılmderinde biraz rólderdi somdady.

Rejısserlik-qoıylymdyq jumystary: M. Zadornovtyń «Kúıeýińizdi satyńyzshy» spektakli, B. Muqaıdyń «Kavalerleri», O. Boranbaevtyń «Balamýty», Q. Muhametjanov pen Sh. Aıtmatovtyń «Fýdzııamadaǵy kezdesý» jáne basqalar. M. Áýezovtiń 100 jyldyǵyna arnalǵan Halyqaralyq festıvalda «Qobylandy» spektakliniń qoıylymy úshin «Eń úzdik rejısser» bas júldesin aldy.

QR Mádenıet jáne aqparat mınıstrligi jazýshy Orazhan Sádýaqasulynyń otbasy men týǵan-týystaryna kóńil aıtady.