Belgııanyń toqyma fabrıkasyndaǵy órt: TJ jospary jarııalanyp, turǵyndar evakýatsııalandy
ASTANA.KAZINFORM - Belgııanyń Tıýbız qalasyndaǵy (Vallon Brabant provıntsııasy) toqyma fabrıkasynyń qoımasynan úlken órt shyqty. Bılik tútinnen ýlaný qaýpine baılanysty jergilikti tótenshe jaǵdaı jarııalady, dep habarlaıdy Kazinform agenttiginiń EO-daǵy tilshisi.
Órt tús kezinde Rue de la Filature kóshesindegi 1000 sharshy metrden astam aýmaqty alyp jatqan qoımada bastaldy. Jalyn lezde óndiristik ǵımaratty sharpydy.
Qalyń qara tútin júzdegen metrge kóterilip, ondaǵan shaqyrym qashyqtyqta kórindi.
Eski ǵımarattyń qurylymynda asbest bolýy múmkin bolǵandyqtan jáne qoıma ishinde atsetılen ballondary ornalasqandyqtan jaǵdaı kúrdelene tústi. Sondyqtan Tıýbız meri Samıýel D'Oratsıo tótenshe jaǵdaı josparyn iske qosty.
— Eń basty basymdyq adamdardyń qaýipsizdigi. Jaqyn mańdaǵy ǵımarattardyń turǵyndary shuǵyl túrde evakýatsııalandy. Halle qalasyn qosa alǵanda, kórshiles eldi mekenderdiń turǵyndaryna úılerinde qalýǵa jáne terezeleri men esikterin tyǵyz jabýǵa keńes beriledi, -dep málimdedi jergilikti ákimshilik.
Órtti sóndirý jumystaryna eldiń birneshe aımaǵynan órt sóndirýshiler, sondaı-aq azamattyq qorǵanys bólimsheleri qatysty.
Aldyn ala málimet boıynsha, turǵyndardyń eshqaısysy zardap shekken joq, biraq úsh órt sóndirýshi órtpen kúresý kezinde ystyqtan zardap shegip, aýrýhanaǵa jatqyzyldy.
Keshke qaraı qutqarýshylar órtti baqylaýǵa aldy. Bılik ókilderiniń aıtýynsha, órtti tolyǵymen sóndirý jáne ornyn tazartý jumystary túni boıy jalǵasady jáne birneshe kúnge sozylýy múmkin.
Órttiń shyǵý sebebi anyqtalyp jatyr.
Buǵan deıin AQSh-tyń Florıda shtatyndaǵy tabıǵı órttiń órship turǵany týraly habarlanǵan.
