Belgııada mınıstrlik azamattardan Frantsııadaǵy úlken jıyndardan aýlaq bolýyn surady

ASTANA. KAZINFORM – Belgııanyń Syrtqy ister, syrtqy saýda jáne yntymaqtastyq mınıstrliginiń saıtynda belgııalyqtar úshin Frantsııada bolǵan kezde eskertý jarııalandy.

«Belgııalyqtar óte qyraǵy bolyp, úlken jıyndar men adamdar kóp jınalatyn oryndardan aýlaq júrip, jergilikti bıliktiń nusqaýyn oryndaýlary kerek. Eń joǵary qaýip deńgeıi búkil Frantsııaǵa qatysty. Jergilikti bılik bul turǵyda naqty sharalardy jarııalaýy múmkin», - dep atap ótti Belgııa SІM.

Sonymen qatar Brıýssel Parıjde, Marselde, sonymen qatar Kókshil jaǵalaýda qyraǵy bolýdy usynǵan.

«Ásirese, usaq qylmys kóp. Kelesi saqtyq sharalaryn oryndańyz: jeke kýáligińizdi nemese tólqujatyńyzdy árqashan ózińizben birge saqtańyz, al qundy zattarly qaýipsiz jerde qaldyryńyz. Magıstraldarda jáne demalys oryndarynda abaı bolyńyz. Urylar kólikterdi aıdap áketý úshin ártúrli amaldardy qoldanady. Olar apatqa ushyraǵan, kóligi buzylǵan qurbandar nemese kómekteskisi keletindeı keıip tanytady. Kólikten túspeı, jolyńyzdy jalǵastyryńyz. A1 tasjolynda ásirese keptelis kezinde tonaý jıi bolady. Qylmyskerler kepteliste turǵan kólikter arasynda jaıaý nemese skýterlermen qozǵalady. Jolaýshy otyratyn jerge nemese artqy orynǵa baǵaly zattardy (ámııandar, kompıýterler, planshetter jáne t.b.) qaldyrmańyz. Sómkelerińizdi otyratyn oryn astyna nemese tómenge qoıyńyz», - dedi belgııalyq tarap Frantsııadaǵy saıahattaýshylarǵa.

Máskeýdegi lańkestik áreketten keıin Frantsııa úkimeti lańkestik qaýip deńgeıin kóterdi. El prezıdenti Emmanıýel Makronnyń aıtýynsha, «Islam memleketi» uıymy Frantsııada lańkestik áreketter jasamaq bolǵan.

Buǵan deıin Frantsııanyń barlaý qyzmetteri 2024 jyly Parıjde ótetin Olımpıada oıyndarynyń ashylý saltanatyna qatysýdan bas tartýdy usynǵany habarlanǵan bolatyn.