Belgııanyń Qorǵanys mınıstri mindetti áskerı qyzmetti qaıtarýdy usyndy
ASTANA. KAZINFORM — Belgııanyń Qorǵanys mınıstri Teo Franken eldegi stýdentterdiń jalǵasyp jatqan narazylyqtary aıasynda mindetti áskerı qyzmetti qaıta engizýdi usynyp, TikTok-qa tyıym salýǵa shaqyrdy, dep habarlaıdy Kazinform Anadolu agenttigine silteme jasap.
Ol bul málimdemesin áleýmettik jelidegi jazbasynda stýdentterdiń narazylyqtaryna qatysty pikir bildire otyryp jasaǵan.
— Jastar mektepterdi qıratyp, muǵalimder men polıtsııa qyzmetkerlerin uryp jatyr. Menińshe, mindetti áskerı qyzmetti qaıta engizýimiz kerek. Ár adam qoǵam ıgiligi úshin eńbek etýdi úırenýi tıis. Bul tek áskerı salamen shektelmeı, densaýlyq saqtaý nemese bilim berý sııaqty salalardy da qamtýy kerek, — dedi Franken.
Mınıstr TikTok áleýmettik platformasyna qatysty da pikir bildirip, ony «qasiret» dep atap, tyıym salýǵa shaqyrdy.
Frankenniń aıtýynsha, TikTok Qytaı barlaý qyzmetiniń baqylaýynda jáne «mıdy azdyratyn» álemdegi eń iri psıhologııalyq operatsııa bolyp sanalady.
— Maqsat — Batys qoǵamymyzdy turaqsyzdandyrý, jastarymyzdy aqymaq ári aýrý etý, — dedi mınıstr.
Franken balalardy tárbıeleýdegi negizgi jaýapkershilik ata-analarǵa júkteletinin de atap ótti.
Buǵan deıin Frantsııada bolǵan stýdentter narazylyǵy Belgııanyń birqatar qalasynda da bastaldy. Oqýshylar oqý jaǵdaıyna, únemdeý sharalaryna jáne Vallonııa — Brıýssel Federatsııasy úkimeti júrgizip jatqan bilim berý salasyndaǵy reformalarǵa qarsy shyqty.
Oqıǵalarǵa baılanysty mýnıtsıpaldyq jáne táýelsiz bilim berý jelilerine qaraıtyn keıbir orta bilim berý mekemeleri jabyldy.
Narazylyqqa qatysýshylar synyptardaǵy oqýshy sanyn azaıtýdy, muǵalimder sanyn jetkilikti deńgeıge jetkizýdi, sheshim qabyldaý protsesine oqýshylar men ata-analardyń qatysýyn keńeıtýdi jáne bilim berýdi barshaǵa qoljetimdi etýdi talap etip otyr.
Aıta keteıik, 1 qazanda frantsýz mektep oqýshylarynyń jappaı narazylyǵy Belgııaǵa da taraǵan bolatyn. Belgııanyń shyǵysynda ornalasqan, frantsýz tilinde sóıleıtin halyq turatyn Lej qalasy men onyń mańynda júzdegen oqýshy oqý oryndarynyń kireberisterin bógedi. Keı jerlerde narazylyq kezinde órt qoıý jáne ǵımarattardy búldirý faktileri tirkeldi.
