Belgııanyń eń iri kompanııasy Qazaqstanda logıstıkalyq ortalyq salmaq
ALMATY. KAZINFORM – Belgııanyń Ahlers halyqaralyq logıstıkalyq kompanııasy kelesi jyly Almaty mańynda iri logıstıkalyq ortalyq salýdy josparlap otyr. Bul týraly Kazinform tilshisine Benılıýks saýda palatasynyń prezıdenti Denıs Van den Veıh aıtty.
Onyń aıtýynsha, kompanııa bes jyl ishinde qurylysqa 80 mıllıonnan 120 mıllıon dollarǵa deıin ınvestıtsııa salady.
«Logıstıkalyq ortalyq óte qajet, óıtkeni ol shaǵyn jáne orta bıznesti damytýǵa yqpal etedi. Sonymen qatar ýaqytsha saqtaý qoımalarynda júkterdiń aıtarlyqtaı kólemin saqtaýǵa jáne óńdeýge múmkindik beredi. Taýarlardy ýaqytyly jetkizý, naryq qajettilikterin oryndaıdy», - dedi ol.
Ol álemdegi geosaıası turaqsyzdyq jaǵdaıynda eki eldiń saýda-ekonomıkalyq yntymaqtastyǵyn keńeıtý qajettigin jáne jańa kólik dálizi eksporttaýshylarǵa budan da kóp múmkindik beretinin atap ótti.
«Kezdesýde logıstıkadan bólek, medıtsınalyq máselelerdi de talqyladyq. Belgııada álemdik standarttarǵa saı ozyq tehnologııalary men zamanaýı quraldary bar medıtsınalyq kompanııalar jumys isteıdi. Bizdiń tájirıbemiz ben tehnologııalarymyz Qazaqstannyń aýrýhanalarynda da qoldanylýy múmkin», - dep qosty ol.
Denıs Van den Veıh Qazaqstannyń Belgııaǵa eksportynyń negizgi taýarlary: molıbden rýdalary men kontsentrattary, hrom oksıdteri men gıdroksıdteri, zyǵyr tuqymdary, tıtan jáne odan jasalǵan buıymdar, kómir, bıdaı, ózdiginen júretin mashınalar, etıl spırti, mashınalarǵa, jabdyqtarǵa jáne kólikterge arnalǵan transmıssııalyq mehanızmder ekenin tilge tıek etti.
«Al Belgııadan qazaqstandyq ımporttyń negizgi taýarlary: traktorlar men júk kóligi traktorlary, munaı ónimderi, aýylsharýashylyq daqyldaryn jınaýǵa jáne bastyrýǵa arnalǵan mashınalar men mehanızmder, bólshek saýdaǵa oralǵan dári-dármekter, vaktsınalar, qan sarysýy, qan, aýa nemese vakýýmdyq sorǵylar, kompressorlar men jeldetkishter, tehnıka jáne arnaıy maqsattaǵy mehanıkalyq qurylǵylar, polıefırler, epoksıdti shaıyrlary», - dep túsindirdi spıker.
Buǵan deıin, Qazaqstan men Belgııa arasyndaǵy taýar aınalymy 523 mln dollardan asqany týraly jazǵan edik.
Aıta keteıik, Almatyda «Qazaqstan-Belgııa» Іskerlik keńesiniń ekinshi otyrysy ótti.
