Belgııanyń 600 jyldyq tarıhy bar ýnıversıteti Qazaqstanda «Sırek metaldardy baıytý» ortalyǵyn ashady
ASTANA. KAZINFORM – Qazaqstan belgııalyq ǵalymdarmen birlesip, sırek jáne mańyzdy mıneraldardy óńdep, olardan joǵary qosylǵan quny bar daıyn ónim óndirýdi kózdep otyr. Osy maqsatta Belgııanyń KU Leuven ýnıversıtetimen birlesken ǵylymı-zertteý ortalyǵyn qurý máselesi talqylanyp jatyr.
Bul týraly Qazaqstan men Belgııanyń mańyzdy mıneraldarǵa arnalǵan semınary kýlýarynda Nazarbaev Ýnıversıtetiniń professory, Energetıka salasyndaǵy jańa materıaldar men tehnologııalar ınstıtýtynyń bas dırektory Jumabaı Bákenov málimdedi.
Semınar qorytyndysyn 13 qazanda Belgııa koroli Fılıpp pen koroleva Matıldaǵa arnalǵan dóńgelek ústelde tanystyrý josparlanǵan.
Professordyń aıtýynsha, Qazaqstanda paıdaly qazbalardy óńdeý tehnologııalary bolǵanymen, olardyń birqatary eskirgen. Al Belgııanyń KU Leuven ýnıversıteti ken baıytý, gıdrometallýrgııa jáne pırometallýrgııa baǵyttaryndaǵy zertteýlerimen tanymal. Bul salalarda tájirıbeli ǵalymdar jumys isteıdi.
– Qazaqstan men Belgııanyń, ásirese KU Leuven ýnıversıteti arqyly yntymaqtastyǵynyń áleýeti zor. Bizdiń maqsattarymyzdyń biri – Qazaqstanda mańyzdy mıneraldardy zertteý jáne óńdeý boıynsha birlesken ortalyqtar qurý, – dedi Jumabaı Bákenov.
Mundaı ortalyqtarda eki eldiń mamandary mańyzdy mıneraldardy óndirý, baıytý jáne óńdeý tehnologııalaryn birlesip ázirleı alady. Sonymen qatar qazaqstandyq stýdentterdiń Belgııada bilim alýyna jáne qos dıplom baǵdarlamalaryna qatysýyna múmkindik jasaý josparlanyp otyr.
– Qazaqstandyq jáne belgııalyq stýdentterdiń eki ýnıversıtette qatar bilim alyp, qos dıplom alý baǵdarlamalaryn talqylaǵymyz keledi. Ǵylymı zertteýler men birlesken ortalyqtardy qurý jumysyn jedeldetýge nıettimiz. Belgııalyq áriptester daıyn bolsa, kelisimderge qol qoıyp, ortalyqtar ashýǵa jáne olardy birlesip qarjylandyrýǵa ázirmiz, – dedi professor.
Qazaqstannyń maqsaty – mıneraldardy tek óndirip, shıkizat kúıinde satýmen shektelmeı, olardy el ishinde tolyq óńdep, daıyn ónim shyǵarý. Atap aıtqanda, otandyq shıkizat negizinde asqyn ótkizgishter, jartylaı ótkizgishter, katalızatorlar men magnıtter óndirý múmkindikteri qarastyrylyp otyr.
Aıta keteıik, Qazaqstan qazirdiń ózinde Belgııaǵa molıbden kenderi men tıtan eksporttaıdy.
Buǵan deıin Belgııalyqtar Koroli Fılıpp Qazaqstannyń baı tarıhymen jáne mádenıetimen jaqyn tanysýǵa nıetti ekenin aıtqan edi.
Óz kezeginde Memleket basshysy Qasym-Jomart Toqaev Qazaqstan men Belgııa arasynda sheshilmegen másele joq ekenin málimdedi.
