Belgııanyń 12 ýnıversıtetimen kelisimshart ornatamyz – Saıasat Nurbek
ASTANA. KAZINFORM – Qazaqstan men Belgııa joǵary bilim jáne ǵylymı zertteýler salasyndaǵy yntymaqtastyqty keńeıtedi. Taraptar jasandy ıntellekt pen matematıkany zertteıtin zerthana, sondaı-aq sırek metaldardy baıytý jáne metallýrgııa ortalyǵyn ashýdy josparlap otyr. Bul týraly Ǵylym jáne joǵary bilim mınıstri Saıasat Nurbek Aqorda kýlýarynda aıtty.
Bul týraly Ǵylym jáne joǵary bilim mınıstri Saıasat Nurbek Aqorda kýlýarynda aıtty.
Mınıstrdiń málimetinshe, erteń alǵash ret Qazaqstan-Belgııa joǵary bilim forýmy ótedi. Forýmǵa Belgııanyń 12 ýnıversıtetiniń rektory qatysady. Qazaqstan tarapynan ulttyq jáne tehnıkalyq joǵary oqý oryndarynyń basshylary keledi. Jıynǵa Qazaqstan Prezıdenti Qasym-Jomart Toqaev pen Belgııa koroli Fılıpp te qatysady.
Saıasat Nurbektiń aıtýynsha, bıyl maýsymda Memleket basshysynyń Brıýsselge resmı saparynda eki mańyzdy kelisimge qol qoıylǵan.
– Birinshisi – Gent ýnıversıteti men Alem.ai ortalyǵy arasynda «Jasandy ıntellekt jáne matematıka» arnaıy zerthanasyn ashý týraly kelisim. Ásirese belgııalyqtar algorıtmder men matematıkalyq modeldeýde óte myqty. Ekinshi mańyzdy kelisim Belgııanyń eń úzdik ýnıversıtetteriniń biri Levenmen jasalǵan. Ol álemniń TOP-50 oqý orny qataryna kiredi jáne 600 jyldyq tarıhy bar. Sol ýnıversıtet pen Óskemendegi Shyǵys Qazaqstan tehnıkalyq ýnıversıteti «Sırek metaldardy baıytý jáne metallýrgııa» ortalyǵyn ashady, – dedi S. Nurbek tilshilerge bergen suhbatynda.
Mınıstr Qazaqstanda sırek metaldar qory mol ekenin, alaıda olardy baıytý, sol shıkizattan qajetti komponentter óndirý, chıpter men ǵarysh tehnologııalaryna arnalǵan materıaldar jasaý ádisterin áli de damytý keregin aıtty.
– Jaqynda Prezıdenttiń Koreıaǵa barǵan saparynda biz Koreıanyń KIRAM sırek metaldar ortalyǵymen arnaıy kelisimshartqa qol qoıdyq. Koreıa úkimeti bul jobaǵa 14,5 mln dollar ınvestıtsııa quıady. Keler jyly Almatyda Sátpaev ýnıversıtetiniń negizinde «Ken baıytý jáne sırek metaldar» ortalyǵy ashylady, – dep eske saldy ol.
Spıkerdiń aıtýynsha, erteńgi Qazaqstan-Belgııa joǵary bilim forýmynda jalpy 12 kelisimge qol qoıylady. Qujattar qos dıplomdy magıstratýra men doktorantýra baǵdarlamalaryn iske asyrýdy, sondaı-aq «Bolashaq» baǵdarlamasy aıasynda doktoranttardy Belgııanyń jetekshi ýnıversıtetterine ǵylymı taǵylymdamaǵa jiberýdi qamtıdy.
Saıasat Nurbek mıkroelektronıka men chıp ındýstrııasyn damytýdy da mańyzdy baǵyttardyń biri retinde atady.
– Belgııada álemdik chıp ındýstrııasy úshin mańyzdy iri ortalyq bar. Belgııa men Nıderlandta chıpterdiń dızaınyn ázirleıtin mamandandyrylǵan ortalyqtar jumys isteıdi. Resmı sapar kezinde osy baǵytta kezdesýler ótkizip, kelissóz júrgizdik. Ázirge naqty kelisimshart jasalǵan joq, sondyqtan jumysty jalǵastyramyz, – dedi mınıstr.
Aıta keteıik, 11-14 qazan kúnderi Belgııalyqtar Koroli Fılıpp jáne Patshaıym Matıldanyń Qazaqstanǵa memlekettik sapary ótedi.
Sapar baǵdarlamasy tórt negizgi baǵytty qamtıdy. Olar – asa mańyzdy paıdaly qazbalar, jasandy ıntellekt, densaýlyq saqtaý, sondaı-aq tarıh pen mádenıet.
Belgııanyń federaldyq mınıstri Jan-Lıýk Krıýıke qazaqstandyqtar qyzmettik pasportpen Eýropanyń úsh eline vızasyz bara alatynyn málimdegen edi.
