Belgııamen qarym-qatynasymyzdyń zor áleýetine senemin — Prezıdent
ASTANA. KAZINFORM — Prezıdent Qasym-Jomart Toqaev Qazaqstan Belgııany Eýropadaǵy ýaqyt tezinen ótken senimdi seriktesi retinde qarastyratynyn atap ótti.
— Kelesi jyly memleketterimizdiń arasynda dıplomatııalyq qarym-qatynas ornaǵanyna 35 jyl tolady. Saparyńyz osy aıtýly mejeniń daıyndyǵyna tyń serpin beredi jáne yntymaqtastyǵymyzdy naqty nátıjelermen tolyqtyra túsedi. Belgııa Qazaqstannyń jetekshi saýda seriktesteriniń qataryna kiredi. Sonymen qatar elińiz Qazaqstan ekonomıkasyna qarjy quıǵan eń iri on ınvestordyń biri sanalady. Muny Qazaqstan ekonomıkasynyń keleshegine degen senimniń aıqyn kórinisi dep baǵalaımyn, — dedi Prezıdent.
Memleket basshysy Qazaqstan men Belgııa arasynda kólik-logıstıka, asa mańyzdy mıneraldar, jańartylatyn qýat kózderi, aýyl sharýashylyǵy, densaýlyq saqtaý jáne jasandy ıntellekt salalary boıynsha ózara yqpaldastyqty keńeıtýge mol múmkindik bar ekenine nazar aýdardy.
— Sizben birge kelgen memlekettik organdardyń, óńirlik bılik pen isker toptardyń ókilderine, tanymal ǵalymdar men jýrnalısterge iltıpat bildiremin. Erteń Qazaqstan — Belgııa iskerlik keńesiniń tórtinshi otyrysyn ótkizemiz. Bul bastamanyń múmkindikterimizdi iske asyryp, ornyqty nátıjege qol jetkizetin tıimdi alańǵa aınalǵany qýantady. Sondaı-aq Belgııamen Eýropalyq odaq jáne basqa da kópjaqty qurylymdar aıasyndaǵy yqpaldastyǵymyzdy joǵary baǵalaımyz. Jahanda turaqsyzdyq beleń alǵan kezeńde senim, qurmet pen ózara túsinistik qaǵıdattaryn arqaý etken iskerlik baılanystardyń mańyzy arta túsedi. Qarym-qatynasymyzdyń zor áleýetine senemin. Sapar aıasyndaǵy ýaǵdalastyqtardy tolyq iske asyrýǵa barynsha kúsh salamyn, — dedi Qasym-Jomart Toqaev.
Aıta keteıik, 11-14 qazan kúnderi Belgııalyqtar Koroli Fılıpp jáne Patshaıym Matıldanyń Qazaqstanǵa memlekettik sapary ótedi. Sapar baǵdarlamasy tórt negizgi baǵytty qamtıdy. Olar — asa mańyzdy paıdaly qazbalar, jasandy ıntellekt, densaýlyq saqtaý, sondaı-aq tarıh pen mádenıet.
Búgin Qasym-Jomart Toqaev Belgııalyqtar Koroli Fılıpp pen Matılda patshaıymdy Aqordada qarsy aldy.
