Belgııalyq baıqaýshylar Qazaqstandaǵy saılaý ýchaskeleriniń jumysyn joǵary baǵalady
ASTANA. 3 sáýir. QazAqparat /Rýslan Ǵabbasov/ - Belgııalyq baıqaýshylar Qazaqstandaǵy saılaý ýchaskeleriniń jumysyn joǵary baǵalady. Bul jaıynda búgin elimizde ótip jatqan QR Prezıdentiniń kezekten tys saılaýyna qatysty Astanada ótken brıfıngte Halyqaralyq qatynastar eýropalyq ınstıtýtynyń dırektory Irnerıo Semınatore aıtty.
«Saılaý úderisi Qazaqstanda óte jaqsy uıymdastyrylǵan. Atap aıtqanda, jergilikti jerlerdegi saılaý komıssııalarynyń jetekshileri de jumysyn kásibı deńgeıde atqaryp otyr»,-dedi ol.
Sonymen qatar I. Semınatore saılaý ýchaskeleri tańerteńgi saǵat 7:00-den bastap belgilengen ýaqyt boıynsha ashylǵanyn, sondaı-aq daýys berýge nıet bildirgen azamattardyń qatary kóp bolǵanyn aıtyp ótti.
«Saılaý qorytyndysy boıynsha saıası partııalardyń kútip otyrǵan nátıjeleri qanaǵattandyrylady dep úmittenemiz»,-dedi ınstıtýt dırektory.
Sonymen qatar atalǵan brıfıngte «E-Forum» qaýymdastyǵynyń atqarýshy dırektory Bodýen de Sonıs te saılaý ýchaskelerindegi tıisti sharalar jaqsy uıymdastyrylǵanyn atap ótti. Osy oraıda ol bul turǵydaǵy máselelerdi Qazaqstannyń demokratııalyq jolyndaǵy jetistigi dep baǵalady.
