Belgııalyqtar koroli premer-mınıstrdiń otstavkasyn qabyldaýdan bas tartty
ASTANA. KAZINFORM — Belgııalyqtar koroli Fılıpp premer-mınıstr Bart De Veverdiń otstavkasyn qabyldaýdan bas tartyp, oǵan bıýdjet boıynsha kelissózderdi dereý qaıta bastaýdy tapsyrdy. Bul týraly Belgııa Koroldik saraıy habarlady.
Korol saraıynyń málimetinshe, monarh mundaı sheshimdi bıleýshi koalıtsııadaǵy bes partııanyń («Arızona») jetekshilerimen keńeskennen keıin qabyldaǵan. Olar ózara ymyraǵa kelýge daıyn ekenin bildirip, 2029 jylǵa deıingi bıýdjet josparyn ázirleýdi tezirek aıaqtaýǵa nıetti ekenin jetkizgen.
— Korol Premer-mınıstrdiń otstavkasyn qabyldamaı, oǵan bıýdjet jónindegi kelissózderdi dereý qaıta bastaýdy tapsyrdy, — delingen resmı málimdemede. Bart De Vever kelissózderdiń barysy týraly 16 qarashada esep beredi.
Premer-mınıstr 2 qarashada koalıtsııanyń túni boıy júrgizgen kelissózderi nátıjesiz aıaqtalǵan soń otstavkaǵa ketý týraly ótinish bergen. Taraptar onda 2029 jylǵa deıin bıýdjet tapshylyǵyn qysqartý úshin 10 mlrd eýro únemdeý joldaryn qarastyrǵan. Alaıda salyq júktemesi men shyǵystardy qysqartý máselesinde partııalar ortaq kelisimge kele almady.
Korol Fılıpp buǵan deıin geosaıası turaqsyzdyq pen ekonomıkalyq ahýaldyń kúrdelenýine baılanysty el uzaqqa sozylǵan saıası daǵdarysqa jol bere almaıtynyn aıtqan edi. Otstavkany qabyldamaý koalıtsııaǵa ymyraǵa kelý úshin qosymsha ýaqyt berip, merziminen buryn saılaý ótkizýge jol bermeıdi.
Buǵan deıin Paragvaı prezıdentiniń bank daǵdarysy men jappaı narazylyqtan keıin otstavkaǵa ketkeni habarlanǵan bolatyn.
