Belgııalyqtar Koroli men Patshaıymynyń Qazaqstanǵa alǵashqy sapary: sheteldik BAQ ne jazyp jatyr
ASTANA. KAZINFORM – Belgııalyqtar Koroli Fılıpp pen Patshaıym Matıldanyń Qazaqstanǵa memlekettik sapary tarıhı mańyzymen ǵana emes, ekonomıkalyq kún tártibimen de sheteldik buqaralyq aqparat quraldarynyń nazaryn aýdardy.
Sheteldik basylymdar Qazaqstandy kólik dálizderin damytý, strategııalyq mańyzy bar mıneraldarǵa qol jetkizý, ınvestıtsııa tartý jáne ǵylymı-tehnologııalyq yntymaqtastyqty keńeıtý turǵysynan Eýropanyń mańyzdy seriktesi retinde qarastyryp otyr. Jarııalanymdarda, ásirese Orta dálizdiń áleýetine, eýropalyq bıznes úshin ashylatyn múmkindikterge jáne shıkizat saýdasynan birlesken óndiristik ári tehnologııalyq jobalarǵa kóshý perspektıvasyna erekshe nazar aýdarylǵan.
Paris Match: «Qazaqstanǵa memlekettik sapar: koroldik jupty Astanadaǵy Prezıdent rezıdentsııasynda erekshe qurmetpen qarsy aldy»
Belgııalyq Paris Match jýrnaly Korol Fılıpp pen Patshaıym Matıldany Aqordada resmı qarsy alý rásimin egjeı-tegjeıli sıpattady.
Basylymnyń jazýynsha, saltanatty rásim barysynda eki eldiń memlekettik ánurandary oryndalyp, Prezıdenttik gvardııa saraıdyń saltanat zalynda koroldik jup pen Qazaqstan Prezıdenti Qasym-Jomart Toqaevqa qurmet kórsetti. Aqorda ǵımaratynyń ústinen Qazaqstan men Belgııanyń memlekettik týlaryn alyp ushqan tikushaqtar ótti.
Jarııalanymda resmı qarsy alý rásimine qatysqan eki eldiń ókilderi de atap ótilgen.
EU Reporter: «Qazaqstan men Belgııa seriktestiktiń jańa kezeńine qadam basady»
Eýropalyq EU Reporter basylymy Qazaqstannyń Belgııadaǵy elshisi Roman Vasılenkonyń ekijaqty yntymaqtastyqtyń keleshegine arnalǵan maqalasyn jarııalady.
Avtordyń pikirinshe, Korol Fılıpp pen Patshaıym Matıldanyń memlekettik sapary uzaq jyldar boıy qalyptasqan dıplomatııalyq jáne iskerlik baılanystardy jańa naqty kelisimdermen tolyqtyrýǵa múmkindik beredi.
Maqalada Belgııa Qazaqstan ekonomıkasyna ınvestıtsııa salatyn iri eýropalyq elderdiń biri ekeni atap ótilgen. Yntymaqtastyqtyń perspektıvaly baǵyttary retinde Orta dálizdi damytý, logıstıka, aýyl sharýashylyǵy, strategııalyq mańyzy bar mıneraldar, jasandy ıntellekt, densaýlyq saqtaý, ǵylym jáne bilim berý salalary atalǵan.
Azııa men Eýropany Qazaqstan, Kaspıı teńizi jáne Ońtústik Kavkaz arqyly baılanystyratyn kólik baǵytyna erekshe nazar aýdarylǵan. Avtordyń paıymdaýynsha, bul baǵytty damytý úshin port ınfraqurylymy, temirjol tasymaly, júk óńdeý jáne logıstıkalyq qyzmet kórsetý salalarynda úılesimdi sheshimder qabyldaý qajet.
Maqalada strategııalyq mańyzy bar shıkizat salasyndaǵy yntymaqtastyqtyń áleýeti de keńinen qarastyrylǵan. Eýropa ónerkásibi úshin jetkizilim kózderin ártaraptandyrý mańyzdy bolsa, Qazaqstan tehnologııa tartýǵa, shıkizatty tereń óńdeýge jáne qosylǵan quny joǵary ónim shyǵarýǵa múddeli.
Budan bólek, ýnıversıtetter arasyndaǵy baılanystar, birlesken ǵylymı zertteýler, medıtsınalyq tehnologııalar jáne mádenı almasýlar perspektıvaly baǵyttar retinde kórsetilgen.
Atap aıtqanda, avtor belgııalyq ýnıversıtetterdiń sapar aıasyndaǵy akademııalyq baǵdarlamaǵa qatysýyna jáne josparlanǵan mádenı is-sharalarǵa nazar aýdarǵan.
Maqalasynyń sońynda Roman Vasılenko sapardyń nátıjeliligi tek qol jetkizilgen kelisimdermen emes, olardyń is júzinde oryndalýymen, birlesken jobalardyń iske qosylýymen, ǵylymı baılanystardyń damýymen jáne iskerlik yntymaqtastyqtyń nyǵaıýymen baǵalanatynyn atap ótken.
The Brussels Times: «Koroldik jup Qazaqstanǵa memlekettik saparmen attandy»
Belgııalyq The Brussels Times basylymy Korol Fılıpp pen Patshaıym Matıldanyń Qazaqstanǵa sapary Belgııa monarhynyń Ortalyq Azııaǵa jasaǵan alǵashqy memlekettik sapary ekenin atap ótti.
Basylymnyń jazýynsha, sapar eki el arasyndaǵy ekonomıkalyq, akademııalyq jáne mádenı baılanystardy nyǵaıtýǵa baǵyttalǵan.
Astanada koroldik jup Qazaqstan Prezıdenti Qasym-Jomart Toqaevpen kelissózder júrgizdi. Budan keıin sapar baǵdarlamasy Almatyda jalǵasady.
The Brussels Times málimetinshe, Belgııa delegatsııasynyń quramyna úkimet ókilderi, shamamen 25 kompanııa basshysy jáne akademııalyq qaýymdastyqtyń 11 ókili kirgen. Olardyń arasynda jeti ýnıversıtet rektory bar.
Basylym Korol Fılıpptiń taqqa otyrǵanǵa deıin Qazaqstanǵa úsh ret kelgenin de eske saldy.
Atap aıtqanda, 2002 jáne 2009 jyldary ol belgııalyq ǵaryshker Frank De Vınneniń Halyqaralyq ǵarysh stantsııasyna ushýyna baılanysty Baıqońyrǵa kelgen. Al 2010 jyly Qazaqstanǵa barǵan ekonomıkalyq mıssııany basqarǵan.
Maqalada Eýropa men Azııa arasyndaǵy mańyzdy kólik baǵyty sanalatyn Orta dálizdi damytý máselesine de erekshe kóńil bólingen. Sonymen qatar logıstıka men aýyl sharýashylyǵy ekijaqty yntymaqtastyqtyń negizgi baǵyttary retinde atalǵan.
RTL info: «Fılıpp pen Matıldanyń Qazaqstanǵa sapary: Belgııanyń Ortalyq Azııaǵa alǵashqy memlekettik sapary qalaı ótedi?»
Belgııanyń frantsýz tilindegi RTL info basylymy da koroldik juptyń Qazaqstanǵa saparynyń tarıhı mańyzyn atap ótti.
Jarııalanymda Korol Fılıpp pen Patshaıym Matıldanyń Qazaqstanǵa ekonomıkalyq, ýnıversıtetaralyq jáne mádenı baılanystardy nyǵaıtýǵa baǵyttalǵan delegatsııamen birge kelgeni aıtylǵan.
RTL info sapardyń negizgi is-sharalarynyń biri retinde Qazaqstan-Belgııa iskerlik keńesiniń tórtinshi otyrysyn atap kórsetedi. Onda logıstıka jáne aýyl sharýashylyǵy salalaryndaǵy yntymaqtastyq máselelerin talqylaý josparlanǵan.
Basylym sondaı-aq Transkaspıı halyqaralyq kólik baǵytynyń mańyzyna toqtalǵan. Onyń baǵalaýynsha, halyqaralyq saýda baılanystaryndaǵy ózgerister aıasynda bul baǵyttyń strategııalyq róli artyp keledi.
Belga News Agency: «Belgııalyqtar Koroli memlekettik sapar barysynda Qazaqstanmen tyǵyz baılanystardy atap ótti»
Belgııanyń ulttyq aqparat agenttigi Belga News Agency Korol Fılıpptiń eki el arasyndaǵy tarıhı baılanystar, ekonomıkalyq seriktestik jáne Qazaqstannyń halyqaralyq kólik júıesindegi róli týraly málimdemelerine nazar aýdardy.
Jarııalanymda monarhtyń Qazaqstan men Belgııa arasyndaǵy qarym-qatynastardyń otyz jyldan astam ýaqyt boıy damyp kele jatqanyn atap ótkeni jazylǵan.
Sonymen qatar ol Eýropalyq odaq pen Qazaqstan arasyndaǵy 2020 jyly kúshine engen Keńeıtilgen áriptestik jáne yntymaqtastyq týraly kelisimdi eske salǵan.
Agenttiktiń málimetinshe, Korol Fılıpp Qazaqstandaǵy tsıfrlandyrý men jasandy ıntellekt salalarynyń damýyn joǵary baǵalap, eldiń Eýropa men Azııany baılanystyratyn memleket retindegi geosaıası mańyzyn atap ótken.
– Qazaqstan men Belgııa arasyndaǵy saýda kólemi on jylǵa jetpeıtin ýaqyt ishinde úsh esege jýyq ósti. Eger 2016 jyly bul kórsetkish 220 mln eýro bolsa, 2025 jyly 765 mln eýroǵa jetti, – degen Korol Fılıpptiń sózi keltirilgen jarııalanymda.
The Nation: «Belgııalyqtar Koroli men Patshaıymy Astanaǵa keledi: baǵdarlamada 14 is-shara bar»
Pákistannyń The Nation basylymy Belgııa koroldik jubynyń Qazaqstanǵa sapar baǵdarlamasyna toqtaldy.
Basylym Astana men Almatyda memlekettik organdardyń, bıznes ókilderiniń jáne akademııalyq qaýymdastyqtyń qatysýymen ótetin is-sharalar týraly jazǵan.
Jarııalanymda sapar aıasynda jalpy 14 is-shara josparlanǵany aıtylǵan.
The Nation ýnıversıtetter men bıznes ókilderiniń sapar baǵdarlamasyna qatysýyn erekshe atap ótken. Basylym muny eki eldiń ekonomıka, ǵylym jáne tehnologııa salalaryndaǵy yntymaqtastyqty keńeıtýge umtylysymen baılanystyrady.
Benin Web TV: «Qazaqstan: belgııalyq koroldik jupty Astanada saltanatty túrde qarsy aldy»
Afrıkalyq Benin Web TV basylymy Korol Fılıpp pen Patshaıym Matıldany Astanadaǵy Prezıdent saraıynda resmı qarsy alý rásimin jarııalady.
Materıalda sapardyń ekonomıkalyq quramdas bóligine de jeke toqtalǵan.
Atap aıtqanda, 13 qazanǵa josparlanǵan Qazaqstan-Belgııa iskerlik keńesiniń otyrysy, logıstıka jáne aýyl sharýashylyǵy salalaryndaǵy yntymaqtastyq máseleleri qamtylǵan.
Sonymen qatar basylym eki eldiń ekonomıkalyq, akademııalyq, mádenı jáne ǵylymı baılanystaryn keńeıtý josparlaryna nazar aýdarǵan.
The Astana Times: «Belgııa koroldik jubynyń Qazaqstanǵa sapary dıplomatııadan bólek nege mańyzdy?»
Aǵylshyn tilinde shyǵatyn The Astana Times basylymy koroldik juptyń saparyn Qazaqstannyń ekonomıkalyq seriktesterin ártaraptandyrý, eýropalyq tehnologııalar men ınvestıtsııalar tartý jáne halyqaralyq saýda múmkindikterin keńeıtý turǵysynan qarastyrǵan.
Bul maqala The Astana Times basylymyna silteme jasala otyryp, EUalive platformasynda da jarııalanǵan.
Materıalda Belgııamen yntymaqtastyq dástúrli saýdamen ǵana shektelmeı, ónerkásiptik óńdeý, kólik ınfraqurylymy, strategııalyq mańyzy bar mıneraldar, densaýlyq saqtaý jáne jasandy ıntellekt salalaryn qamtýy múmkin ekeni aıtylǵan.
Jarııalanymda keltirilgen málimetterge sáıkes, Qazaqstannyń Belgııaǵa eksporty 311,5 mln dollarǵa, al Belgııadan ımport kólemi 270,9 mln dollarǵa jetken.
Basylym eki el arasyndaǵy taýar aınalymynyń qurylymyna da taldaý jasaǵan.
Atap aıtqanda, Belgııadan Qazaqstanǵa jetkiziletin taýarlardyń edáýir bóligin farmatsevtıkalyq jáne hımııalyq ónimder, mashınalar men jabdyqtar quraıdy.
Al Qazaqstan Belgııaǵa ósimdik sharýashylyǵy ónimderin, sonyń ishinde zyǵyr tuqymyn, mıneraldy shıkizat pen metaldardy eksporttaıdy.
Maqalada keltirilgen derekter boıynsha, 2005-2025 jyldar aralyǵynda Belgııadan Qazaqstanǵa tartylǵan tikeleı sheteldik ınvestıtsııalardyń jalpy kólemi 14 mlrd dollardan asqan. Onyń ishinde 2025 jyly 1,045 mlrd dollar ınvestıtsııa quıylǵan.
Basylym sondaı-aq ekijaqty ınvestıtsııalyq yntymaqtastyqtyń keleshegine toqtalǵan.
Maqalada pikir bildirgen Qazaqstan strategııalyq zertteýler ınstıtýtynyń sarapshysy Álisher Ábdireshev ınvestıtsııa, kólik, logıstıka, ónerkásip jáne tehnologııa salalaryndaǵy yntymaqtastyqtyń áleýetin atap ótken.
Onyń baǵalaýynsha, Belgııa Qazaqstan úshin ónerkásipti damytý jáne Eýropa naryqtaryna shyǵý múmkindikterin keńeıtý baǵytyndaǵy mańyzdy seriktes bola alady.
Jarııalanymda strategııalyq mańyzy bar mıneraldar máselesine de erekshe kóńil bólingen.
Atap aıtqanda, Qazaqstanda Eýropalyq odaq asa mańyzdy dep sanaıtyn shıkizattyń 34 túriniń 21-i bar ekeni kórsetilgen.
Sarapshynyń pikirinshe, belgııalyq kompanııalarmen yntymaqtastyq metaldardy óńdeýdi damytýǵa, ónerkásiptik quramdas bólshekter shyǵarýǵa jáne turaqty jetkizý tizbekterin qalyptastyrýǵa yqpal etýi múmkin.
Basylym Qazaqstan men Belgııa arasyndaǵy seriktestiktiń bolashaǵy tek shıkizat jetkizýmen shektelmeı, joǵary tehnologııalyq óndiristerdi damytýǵa jáne qosylǵan quny joǵary ónim shyǵarýǵa negizdelýi tıis degen tujyrymǵa kelgen.
Aıta keteıik, búgin Memleket basshysy Qasym-Jomart Toqaev pen Belgııalyqtar Koroli Fılıpp Qazaqstan Respýblıkasy men Belgııa Koroldiginiń birlesken málimdemesin qabyldady. Qujatta jasandy ıntellekt, strategııalyq mańyzy bar mıneraldar, kólik jáne bilim berý salalaryndaǵy yntymaqtastyq baǵyttary aıqyndaldy.
