Belgııalyqtar Koroli Qazaqstanda: Altyn Orda dáýirinen tamyr tartatyn tarıhpen tanysýǵa asyqpyn
ASTANA. KAZINFORM – Belgııalyqtar Koroli Fılıpp Aqordada aıtqan málimdemesinde Qazaqstannyń baı tarıhymen jáne mádenıetimen jaqyn tanysýǵa nıetti ekenin jetkizdi.
– Astana men Almatynyń kórikti jerleri men mýzeılerin aralap, Altyn Orda dáýirinen tamyr tartatyn tarıhpen til qatysýǵa asyqpyn. Belgııa delegatsııasymen birge Abaı shyǵarmalarynda aıryqsha sýrettelgen, qazaqtyń ulttyq erekshelikterin pash etetin tabıǵı jáne mádenı qazynamen tanysýǵa qushtarmyz. Qazaq eli qonaqjaılyǵymen máshhúr. Elderińiz qoǵamnyń yntymaq-birligin óz ishinde ǵana emes, aımaqtyq jáne halyqaralyq deńgeıde nyǵaıtýǵa belsendi túrde úles qosyp keledi. Osy baǵytta Qazaqstan árdaıym mańyzdy ról atqarady, – dedi ol.
Belgııalyqtar Koroli sóz sońynda kórsetilgen syı-qurmet úshin Qasym-Jomart Toqaevqa taǵy da alǵys aıtty.
– «Shańyraǵyńyz bıik bolsyn!». Men bul sózdi durys aıttym dep oılaımyn. Qazaqstanǵa memlekettik saparymyzdyń mánin atalǵan tilek tolyǵymen ashady. Otbasy birligi men urpaqtar sabaqtastyǵyn, yrys pen nesibeni, beıbit ómir men jyly uıany osy biraýyz sózge syıdyrýǵa bolady, – dedi Korol Fılıpp.
Eske sala ketsek, búgin Qasym-Jomart Toqaev Belgııalyqtar Koroli Fılıpp pen Matılda patshaıymdy Aqordada qarsy aldy.
Buǵan deıin Memleket basshysy Qasym-Jomart Toqaev Qazaqstan men Belgııa arasynda sheshilmegen másele joq ekenin aıtqan edi.
Sondaı-aq eki eldiń mýzeıleri baılanysty nyǵaıtyp, vızalyq talaptar jeńildeıdi.
