Belgııalyqtar Koroli Fılıpp pen Matılda patshaıym Aqordaǵa keldi
ASTANA. KAZINFORM — Memleket basshysy Qasym-Jomart Toqaev Belgııalyqtar Koroli Fılıpp pen Matılda patshaıymdy Aqordada qarsy aldy.
Joǵary mártebeli meımandardyń saparyna oraı saltanatty rásimder zalynda Qurmet qaraýyly sap túzedi. Taraptar resmı delegatsııa múshelerin bir-birine tanystyrdy.
Odan keıin Qurmet qaraýyly rotasynyń komandıri saltanatty raport berdi.
Prezıdenttik orkestr Qazaqstan men Belgııanyń memlekettik ánurandaryn oryndady.
Qasym-Jomart Toqaev, Korol Fılıpp pen Matılda patshaıym kilem tóselgen jolmen Qazaqstannyń Memlekettik týyna qaraı júrip ótti. Osydan keıin eki el basshylarynyń shaǵyn quramdaǵy kezdesýi bastaldy.
Aıta keteıik, 11-14 qazan kúnderi Belgııalyqtar Koroli Fılıpp jáne Patshaıym Matıldanyń Qazaqstanǵa memlekettik sapary ótedi.
Sapar baǵdarlamasy tórt negizgi baǵytty qamtıdy. Olar — asa mańyzdy paıdaly qazbalar, jasandy ıntellekt, densaýlyq saqtaý, sondaı-aq tarıh pen mádenıet.
Belgııadan Qazaqstanǵa 110 adamnan turatyn delegatsııa keldi. Onyń quramynda tórt mınıstr, 25 kompanııa basshysy, 10 ýnıversıtet rektory jáne 13 jýrnalıst bar. Delegatsııa quramynyń aýqymdy bolýy Belgııa tarapynyń aldaǵy saparǵa joǵary qyzyǵýshylyq tanytyp otyrǵanyn kórsetedi.
Eýropalyq monarhtar Astana men Almatydaǵy mádenıet jáne ǵylym nysandaryn aralap, eki el arasyndaǵy yntymaqtastyqqa arnalǵan kezdesýlerge qatysady.
Sapar qorytyndysy boıynsha Birlesken málimdeme qabyldanyp, birqatar qujatqa qol qoıylady.
Buǵan deıin Kazinform memlekettik sapardyń kún tártibinde qandaı mańyzdy sharalar josparlanǵanyn jazǵan edi.
