Belgııalyq Jánibek Jumaǵulovtyń týǵan anasyn tabýǵa qatysty Bas prokýratýraǵa ótinish jiberildi
ASTANA. KAZINFORM – Belgııa azamaty asyrap alǵan 22 jastaǵy Jánibek Jumaǵulov (Djanı) Qazaqstanda týǵan anasyn izdep jatyr. Ázirge anasyn tabý múmkin bolmaı jatyr, izdestirý jumystary jalǵasýda. Osy oraıda Kazinform agenttiginiń tilshisi otandasymyzdyń anasyn izdestirý jumystarynyń barysymen tanysý úshin Jánibek Jumaǵulovtyń Qazaqstandaǵy resmı ókili Qymbat Dosjanmen suhbattasqan edi.
«2004 jyly Qazaqstannan asyrap alynǵan Jánibek Jumaǵulovtyń týǵan anasyn izdeýmen aınalysqanymyzǵa bir jarym aıdan asty. Osy ýaqyt ishinde biraz derek jınadyq jáne keıbir jaıttardy quqyq qorǵaý organdarynyń kómeginsiz jasaı almaıtynymyzdy túsindik. Osy oraıda biz (Jánibek Jumaǵulov, Qymbat Dosjan Jánibektiń Qazaqstandaǵy resmı ókili) Arqalyq qalalyq polıtsııa departamentine «Salǵyrttyq» (nemquraılylyq) degen bappen is qozǵaý týraly aryz jazdyq. Alaıda aryzdyń qylmystyq quramy joq dep jaýyp tastady», - dedi Qymbat Dosjan.
Resmı ókildiń aıtýynsha, Jánibek Jumaǵulov elimizge týǵan anasyn izdep kelgen jáne Qazaqstanǵa kelý úshin ol 6 aı boıy tabysyn únemdep, jınaǵan. Jerlesimiz áleýmettik jelide týǵan anasyn izdeý týraly vıdeo habarlamada ózin Djanı dep tanystyrǵan, jasy 21-de. Sonymen qatar Q. Dosjan atalǵan máseleni qaraý týraly ótinishti Bas prokýratýraǵa jibergenin málim etti.
«Aryzda saraptamalyq zertteýlerdiń nátıjesi men Jánibekti asyrap alýǵa qatysty ózimiz kóz jetkizgen málimetter kórsetildi. Bas prokýratýraǵa ótinishti balalardy shetel asyrý, ıaǵnı qylmystyq quramy bar bapqa súıene otyryp jazdyq. Ázirge osy jaıt týraly tolyq málimetti ashyp aıta almaımyn. Prokýratýranyń jaýabyn kútemiz. Jánibekti asyrap alǵan Belgııa azamaty oǵan qatysty derekter men sýretin elektrondy poshta arqyly alǵan. Ol kezde halyqaralyq bala asyrap alý týraly agenttikteri bizdiń elimizde, odan bólek, Reseı, Túrkııa taǵy basqa memleketterde jumys istedi», - deıdi ol.
Sondaı-aq, spıker ol kezde (2000 jyldardyń basy) elimizde balalardy shetel azamattaryna asyrýǵa berýge qatysty baza bolmaǵanyn aıtty. Odan bólek, resmı ókilmen suhbat barysynda Jánibekti asyrap alǵan belgııalyq azamattyń Qazaqstanǵa kelgende laýazymdy tulǵaǵa iri kólemde aqsha bergeni belgili boldy.
«Jánibektiń týǵan jerine sapary biraz bylyqtyń betin ashqaly tur. Sebebi sol kezde Arqalyqtaǵy balalar úıinde jumys istegen qyzmetkerler áli de ornynda júr. Men Jánibektiń anasymyn dep kelgen áıel boldy, biraq DNK-y sáıkes kelmedi. Týǵan anasyn ázirge taba almaı jatyrmyz. Qazir bar ýaqytymyzdy osy iske arnap jatyrmyz jáne Jánibektiń týǵan anasyn izdeý jáne istiń mán jaıyn anyqtaý jumysy toqtamaıdy», - dep tolyqtyrdy Qymbat Dosjan.
