Belgııalyq Steın qazaq tilin 7 jyl úırenip, Syrym atandy

ASTANA. KAZINFORM – Belgııalyq stýdent Steın Romboýt, qazaqsha esimi — Syrym, jeti jyl boıy ınternet arqyly qazaq tilin óz betinshe úırenip, Qazaqstanda bilim alyp júr. Qazir ol Almatydaǵy Abylaı han atyndaǵy Qazaq halyqaralyq qatynastar jáne álem tilderi ýnıversıtetinde aýdarma isi mamandyǵy boıynsha oqyp jatyr jáne Jibek Joly telearnasyndaǵy «Bugin Live» baǵdarlamasyna arnaıy suhbat berdi.

Syrym alǵash ret Qazaqstanǵa 2018 jyly kelgen. Almaty, Shymkent, Túrkistan qalalaryn aralap, qazaq mádenıeti men halqyna degen erekshe yqylas sezingenin aıtady. Sol sapardan keıin qazaq halqyna, onyń qonaqjaı minezi men ulttyq taǵamdaryna ǵashyq bolǵan.

– Qazaq tilin ınternettegi túrli resýrstar arqyly úırendim. Grammatıkany kitaptardan oqyp, adamdarmen sóılesý arqyly tildi damyttym. Arnaıy kýrsqa barmadym, barlyǵyn óz kúshimmen meńgerdim, – deıdi ol.

Syrym qazaq tilinen bólek golland, aǵylshyn, qytaı tilderin jetik meńgergen. Jalpy alǵanda, 6-7 tildi ártúrli deńgeıde biledi. Qazaqsha esim retinde Syrym esimin tańdaýynyń da ózindik sebebi bar.

– Syrym Datuly týraly bilgen soń, osy esimdi tańdadym. Onyń maǵynasy da, tarıhy da unaıdy, – deıdi belgııalyq stýdent.

Qazaq tilindegi keıbir sózder de Syrymnyń erekshe yqylasyna ıe bolǵan. Máselen ony «aınalaıyn», «ýájdeme» jáne «mássaǵan» sózderiniń aıtylýy qyzyqtyrady.

Sonymen birge, qazaq tilin úırenýdegi negizgi qıyndyqtardyń biri – resýrstar tapshylyǵy bolǵan. Sheteldik stýdent til deńgeıi joǵarylaǵan saıyn qajetti materıaldardyń azdyǵy baıqalǵanyn aıtady.

Aldaǵy josparlaryna toqtala kele, Syrym Qazaqstanda qalý-qalmaýy jumys tabýyna baılanysty ekenin jetkizdi.

– Eger jaqsy jumys taba alsam, Qazaqstanda qalýym múmkin. Mundaǵy ómir unaıdy: tabıǵaty ádemi, halqy qonaqjaı, aýasy taza, taǵamdary dámdi, – dep bólisti Syrym.

Aıta keteıik, qarasha aıynda qazaq tilin úıretetin JI-agent iske qosylady.