Belgııaǵa 19 tonna almurt keri qaıtaryldy

ASTANA. KAZINFORM — 19 tonna almurt fıtosanıtarlyq sertıfıkattyń bolmaýyna baılanysty Belgııaǵa keri jiberildi, dep habarlaıdy Agroónerkásiptik keshendegi memlekettik ınspektsııa komıtetiniń baspasóz qyzmeti.

Mańǵystaý oblysynyń Quryq portyna Belgııa Koroldiginen jalpy salmaǵy 19,2 tonnany quraıtyn karantınge jatqyzylǵan ónim — almurt partııasy keldi.

— Qujattyq tekserý barysynda ónimniń Qazaqstan aýmaǵyna memlekettik shekara arqyly ótkizý kezinde mindetti bolyp esepteletin fıtosanıtarlyq sertıfıkatsyz ákelingeni anyqtaldy. Ósimdikter karantıni salasyndaǵy zańnama talaptarynyń buzylýyna baılanysty ımporttaýshyǵa ákimshilik aıyppul salynyp, ónim partııasyn eksporttaýshy el — Belgııaǵa keri qaıtarý týraly akt resimdeldi, — delingen komıtet taratqan aqparatta.

QR AShM AÓK memlekettik ınspektsııa komıteti fıtosanıtarlyq talaptardy saqtaý ósimdik sharýashylyǵy ónimderiniń halyqaralyq saýdasyndaǵy mindetti shart ekenin jáne el aýmaǵyna karantındik nysandardyń enýi men taralýyn boldyrmaýǵa baǵyttalǵanyn eske salady.

Budan buryn Reseıden elge ákelingen 20 tonna qus eti keri qaıtarylǵany belgili boldy.