Belgııadaǵy NATO oqý-jattyǵýy kezinde áskerı qyzmetshiler aýyr jaraqat aldy
ASTANA. KAZINFORM — Belgııada NATO áýe-desanttyq kúshteriniń «Falcon Leap» halyqaralyq oqý-jattyǵýy kezinde birneshe áskerı qyzmetshi jaraqat aldy. Bul týraly Eýropa astanasynan Kazinform agenttiginiń menshikti tilshisi habarlaıdy.
Oqıǵa beısenbi kúni Lımbýrg provıntsııasyndaǵy Hehtel-Eksel mýnıtsıpalıtetinde boldy.
Belgııanyń tótenshe jaǵdaılar qyzmeti men nıderlandylyq BAQ-tyń habarlaýynsha, desantshylardyń bir bóligi qatty jeldiń saldarynan qoný aımaǵynan aýytqyp, aǵashtardyń arasynda qalyp qoıǵan.
Oqıǵa ornyna jetken qutqarýshylar aǵashtarǵa ilinip qalǵan bes parashıýtshini túsirdi. Aldyn ala málimetke sáıkes, áskerı qyzmetshilerdiń biri arqasynan aýyr jaraqat alyp, aýrýhanaǵa jatqyzylǵan, taǵy tórteýi jeńil jaraqat alǵan.
Keıbir derekterde zardap shekkenderdiń arasynda AQSh pen Germanııa áskerı qyzmetshileri bar ekeni aıtyldy.
Nıderlandtyń jetekshiligimen ótip jatqan Falcon Leap oqý-jattyǵýlaryna NATO-nyń 11 elinen 250-ge jýyq desantshy qatysyp jatyr.
Belgııa bıyl oqý-jattyǵýǵa tikeleı qatysqan joq, alaıda desantshylardy túsirý úshin óz aýmaǵyn usyndy. Alıanstyń áskerı manevrleri 7-18 qyrkúıek aralyǵynda ótti.
Buǵan deıin Ankaradaǵy NATO sammıti aıasynda halyqaralyq pikirtalastar ótkeni habarlanǵan bolatyn.
Aqzat Jıenalına
