Belgııadaǵy qazaqtar sol jaqta jerlengen qazaqstandyq maıdangerlerdi eske aldy
ASTANA.KAZINFORM - Uly Jeńistiń 80 jyldyǵy qarsańynda Qazaqstannyń Belgııadaǵy elshiliginiń qyzmetkerleri Genk qalasynda jerlengen keńes jaýyngerleriniń beıitine gúl shoqtaryn qoıdy, dep habarlaıdy Kazinform tilshisi.
Genk qalasyndaǵy zırat aýmaǵyna jerlengen (Belgııa astanasynan 100 shaqyrym) keńes jaýyngerleriniń arasynda qazaqstandyq eki jaýynger - Nuradın Bısenov pen Toǵaıbaı Ýálıev bar. Eki jerlesimiz de 1944 jyldyń kókteminde Belgııa jerinde qaza tapty.
Gúl qoıý rásimine qazaqstandyq dıplomattardan bólek, Belgııada turatyn qazaq dıasporasynyń ókilderi men otandyq jýrnalıster qatysty.
2015 jyly beıit basyna marqum qazaqstandyqtardyń biriniń týysy kelgen. Odan keıin Amangeldi Bısenov kópten beri izdeýde júrgen týysy týraly qazaqstandyq telearnalardan bilip, beıit basyna taǵzym etýge bardy. Ózimen birge bir ýys týǵan jerdiń topyraǵyn ala bardy.
Saltanatty sharaǵa qatysqan qazaqstandyqtardyń aıtýynsha, mundaı sharalardyń tarıhı jadyny saqtaý jáne óskeleń urpaqty patrıottyqqa tárbıeleýde mańyzy zor. Uly Jeńis jolynda janqııarlyqpen ótken keńestik jáne qazaqstandyq jaýyngerlerdiń esteligin saqtaý qajettigi týraly aıtyldy.