Belgııada jaýǵan qalyń qar eldiń kólik júıesine zor nuqsan keltirdi

Sársenbi kúni Belgııanyń birqatar bóliginde kóp mólsherde qar jaýdy. Atmosferalyq tsıklon eldiń basty áýejaılarynda, temirjol jáne avtomobıl joldarynda qıyndyqtar týǵyzdy, dep habarlaıdy Kazinform tilshisi.

Jaýyn-shashyn eldiń ońtústiginen soltústikke qaraı jyljıdy. Sársenbi kúni keshke qarbalas ýaqytta Belgııa astanasynyń aınalasyndaǵy negizgi tasjoldarda keptelis ornap, jergilikti poıyzdar uzaq ýaqytqa keshigip kelýde, Brıýssel áýejaıyndaǵy reıster de keshigip jatyr.

Jergilikti jol kompanııasynyń habarlaýynsha, jaýyn-shashyn bastalǵaly jol betine shamamen 1 myń tonna tuz shashyldy, biraq keı joldarda áli de kóktaıǵaq bolyp tur.

«Taıǵaq joldardaǵy jaǵdaıdy tolyǵymen túzete almaımyz. Tóbeshikter men kópirlerde abaı bolyńyz, óıtkeni tuzdy durys taratý qıyn», - delingen kommýnaldyq kompanııanyń málimdemesinde.

Jergilikti kólik tasymaldaýshy poıyzdarda jıi keshige bastady. Flamandtyq Brabant pen Lımbýrgte keıbir poıyzdar toqtatyldy. Gent-Sınt Pıters aımaǵynda da poıyzdar keshigip jatyr.

Brıýssel áýejaıynda da problemalar bar. Jumysshylar ushý-qoný jolaqtaryndaǵy qardy tazalaýda qıyndyqqa tap boldy. Áýe kemeleri eki saǵattan astam ýaqytqa keshigip ushyp-qonýda, keıbir reıster toqtatylýy múmkin.

Jergilikti sınoptıkterdiń boljamynsha, Belgııada qar 18 qańtar tańyna deıin jaýady.