Belgııada jastar men polıtsııa arasynda qaqtyǵys boldy
ASTANA. KAZINFORM — Belgııa astanasy Brıýsselde Frantsııadaǵy jappaı narazylyqtardyń jańǵyryǵy áli de sezilip otyr. Brıýssel men Lej qalalarynda jastar men polıtsııa arasynda kezekti qaqtyǵystar boldy. Bul týraly Kazinform agenttiginiń menshikti tilshisi habarlady.
Senbi kúni Brıýsseldiń ortalyǵynda bastalǵan narazylyq aktsııasy polıtsııamen qaqtyǵysqa ulasty. Elordadaǵy birneshe aýdanda negizinen jastardan quralǵan júzdegen adam tártipsizdik uıymdastyrǵan. Polıtsııa narazylyqty toqtatý úshin kózden jas aǵyzatyn gaz ben sý shashatyn kólikterdi qoldandy.
Tańerteń ártúrli talap qoıǵan 500–600-ge jýyq adam Ortalyq vokzaldan Ońtústik vokzalǵa (Midi) qaraı júrip ótti. Túske taman sherýshiler Eýropa esplanadasyna jetip, polıtsııa olardyń ári qaraı qozǵalýyna shekteý qoıdy.
Shamamen saǵat 12:30–da qaqtyǵys bastaldy. Demonstranttar qurylys qorshaýlarynan barrıkadalar turǵyzyp, quqyq qorǵaý qyzmetkerlerine túrli zattar laqtyrǵan. Buǵan jaýap retinde polıtsııa kózden jas aǵyzatyn gaz ben sý shashatyn kólikterdi paıdalanǵan.
Keıin tártipsizdik qalanyń ortalyǵynda jalǵasty. Lemone býlvary men Stalıngrad dańǵylynda qoqys konteınerleri órtelip, qurylys materıaldary búlingen. Sondaı-aq karsherıng qyzmetine tıesili kólik aýdarylyp qalǵan.
Qaqtyǵystar Ortalyq vokzal mańyna jáne Marol aýdanynda jalǵasty. Brıýsseldegi PS partııasy federatsııasynyń shtab-páterine shabýyl jasalyp, ǵımarattyń terezeleri syndyrylǵan.
Keshke qaraı Bırja alańy mańynda jaǵdaı áli de shıelenisti boldy. Polıtsııa birneshe ret sý shashatyn kólikter men kózden jas aǵyzatyn gaz qoldanyp, adamdardy ustaý sharalaryn júrgizdi. Zardap shekkender men kólikterdiń órtengeni týraly da habarlandy.
Jergilikti BAQ-tyń málimetinshe, narazylyqqa qatysýshylardyń kóbi betperde kıip, antıfashıstik urandar aıtqan. Stýdenttik toptar oqý aqysynyń ósýine jáne óz pikirinshe, joǵary bilimniń qoljetimdiligin tómendetetin reformalarǵa qarsy shyqqanyn málimdedi. Narazylyq aktsııalaryna Frantsııada jalǵasyp jatqan sherýler de ishinara túrtki bolǵan.
Belgııanyń ishki ister mınıstri Bernar Kenten X áleýmettik jelisindegi jazbasynda Brıýsselde bolyp jatqan jaǵdaıdy «qalypty narazylyq dep aıtýǵa kelmeıtinin» aıtyp, ony «uıymdastyrylǵan ári qaıtalanyp otyrǵan ashyq zorlyq-zombylyq» dep baǵalady.
Ol tártipti qalpyna keltirý úshin «búlik shyǵarýshylarǵa qarsy barlyq qajetti shara qoldanylatynyn» atap ótti.
Tártipsizdik saldarynan birneshe metro stantsııasy jabylyp, qoǵamdyq kólik qozǵalysy buzyldy. Polıtsııa birqatar adamnyń ustalǵanyn habarlady. Ustalǵandardyń arasynda kámeletke tolmaǵandar, onyń ishinde jasy óte jas adamdar da bar.
Qazirgi ýaqytta Belgııa astanasyndaǵy jaǵdaı áli de shıelenisti kúıde qalyp otyr.
