Belgııada jalpyulttyq ereýil: reıster men kólik qozǵalysy toqtady

ASTANA.KAZINFORM — Búgin Belgııanyń túkpir-túkpirinde eldegi iri kásipodaqtar uıymdastyrǵan aýqymdy jalpyulttyq ereýil ótip jatyr, dep habarlaıdy Kazinform agenttiginiń menshikti tilshisi.

Túrli málimetterge sensek, sherýge 80 myńnan 120 myńǵa deıin adam qatysty. Narazylyq saǵat 10:45–te Soltúsik vokzalda bastalyp, túngi 12:00–de Ońtústik vokzalda beıbit túrde aıaqtaldy.

Narazylyq qoǵamdyq kólikterge, áýejaılar men memlekettik qyzmetterge aıtarlyqtaı kedergi keltirdi.

Narazylyq aktsııasyna qaýipsizdik pen tehnıkalyq qyzmetkerlerdiń qatysýyna baılanysty Brıýssel men Sharlerýa áýejaılarynan barlyq reıster toqtatyldy. Jolaýshylarǵa ushý ruqsatyn rastamaı áýejaıǵa kelmeý usynylady.

Brıýssel áýejaıy ókilderiniń aıtýynsha, «qyzmetkerlerdiń jappaı bolmaýyna baılanysty operatsııalyq qyzmet múmkin emes». Halyqaralyq áýe kompanııalary kórshi elderge, sonyń ishinde Nıderland pen Frantsııaǵa reıster baǵyty ózgertildi.

El astanasynda metro, avtobýs jáne tramvaı qatynasy da mınımýmǵa deıin qysqardy. Brıýsseldegi STIB kólik kompanııasy kóptegen baǵyttardyń jumysqa jaramsyz ekenin eskertti. Osyndaı jaǵdaı Antverpende, Gentte jáne Lejde baıqalady.

Kóptegen turǵyndar jumysqa jaıaý nemese velosıpedpen barýǵa májbúr. Aıtarlyqtaı kólik keptelisi tirkeldi.

Osylaısha, belgııalyq kásipodaqtar kúnkóristiń qymbattaýy jaǵdaıynda jalaqyny kóbeıtýdi jáne eńbek jaǵdaıyn jaqsartýdy talap etti. Sherýshiler úkimettiń zeınetaqy júıesin ózgertý josparyna da qarsy.

Óz tarapynan Belgııanyń Eńbek mınıstri narazylyq saldaryna ókinish bildirdi, biraq «kásipodaqtarmen dıalog basymdyq bolyp qala beredi» dep atap ótti. Ol úkimet jaqyn kúnderi jańa kelissózderge daıyn ekenin málimdedi.

Aıta keteıik, qańtarda Belgııadaǵy jalpyulttyq ereýil bolyp, 30 myńǵa jýyq adam kóshege shyqqan bolatyn.