Belgııada ulttyq ereýil bolady dep josparlanyp otyr

ASTANA. KAZINFORM – 13 qańtarda Belgııada birden birneshe salaǵa áser etetin aýqymdy ereýil josparlanǵan, dep habarlaıdy Kazinform agenttiginiń menshikti tilshisi.

Kólik sektory, bilim berý, ulttyq túrme qyzmetiniń kásipodaqtary óz múshelerin yqtımal zeınetaqy reformasyna qarsylyq bildirý úshin jalpyulttyq ereýilge qatysýǵa shaqyrdy.

- Usynylǵan sharalar barlyq jumys isteıtin erler men áıelderge buryn-sońdy bolmaǵan shabýyl, - dep málimdedi kásipodaqtar.

Ereýilshiler Brıýsseldegi Albertına alańynda dúısenbi kúni tańerteń saǵat 10:00-de jınalady, biraq resmı aktsııa jeksenbi kúni saǵat 22:00-den dúısenbi kúni 22:00-ge deıin ótedi.

Brıýssel ereýildiń zardaptary aýyr bbolýy múmkin dep boljap otyr.

- Kóptegen reısterdi toqtatýǵa nemese keıinge qaldyrýǵa týra keledi, - dedi «Belga» agenttigine baspasóz hatshy Ihsane Chıýa Lehlı.

Áýe kompanııalary zardap shekken reısterdegi jolaýshylarmen tikeleı baılanysady, dep qosty áýejaı ókili.

SNCB temirjol operatory dúısenbide poıyz qatynasy qatty buzylatynyn rastady. SNCB tasymaldaýshysy seriktes «Infrabel» kompanııasymen birlesip, ereýilge qatyspaıtyn qyzmetkerlerge arnalǵan túzetilgen temir jol qyzmeti kestesin daıyndap jatyr. Jospar senbi kúni jarııalanady jáne jeksenbiden bastap SNCB onlaın saıahat josparlaýshysynda qoljetimdi bolady.

Brıýssel qoǵamdyq kólik operatory STIB de óz jumysynda úlken úzilisterdi shamalap otyr. Ol keıbir qyzmetterine kepildik berýge tyrysady, biraq jolaýshylardan múmkindiginshe balamaly kólik túrlerin paıdalanýyn surady.

Brıýssel turǵyndary dúısenbi kúni qalada qoqys jınalmaýy múmkin ekeni eskertildi. Degenmen, Bruxelles-Propreté (Brıýsselde qoǵamdyq tazalaýǵa jaýapty agenttik) zardap shekken aýdandardaǵy turǵyndar men kásiporyndarǵa ádettegi kesteni saqtaýǵa keńes berdi.

Buǵan deıin Aýstrııada on myńdaǵan adam ásire ońshyl partııaǵa qarsy sherýge shyqqanyn jazǵan bolatynbyz.