Belgııada Tomorrowland elektrondy mýzyka festıvaliniń basty sahnasy janyp ketti

ASTANA. KAZINFORM — Festıvalge bir kún qalǵanda Tomorrowland sahnasy otqa orandy, dep habarlaıdy Kazinform tilshisi.

Belgııada órt saldarynan Tomorrowland elektrondy mýzyka festıvaliniń basty sahnasy nebári bir jarym saǵattyń ishinde tolyǵymen joıyldy.

Tomorrowland — Belgııanyń Bom qalasynda ótetin álemge áıgili elektrondy mýzyka festıvali. Alǵash ret 2005 jyly uıymdastyrylyp, sodan beri álemdegi eń iri jáne tanymal mýzykalyq sharalardyń birine aınaldy. Festıval ádette 3 kúnge sozylady. Bıylǵy jyly festıval 18 shildede bastalýy tıis bolatyn.

Sársenbi kúni shamamen keshki saǵat 18:00–de bastalǵan órt áli de jalǵasyp jatyr dep habarlaıdy jergilikti BAQ. Órttiń naqty sebebi ázirge belgisiz.

Festıval uıymdastyrýshylarynyń málimdeýinshe, eshkim zardap shekpegen, al festıval jospar boıynsha ótedi.

— Biz pozıtıvti kóńil-kúıdemiz, kúsh jınap, tamasha festıval uıymdastyramyz. Biraq, ókinishke qaraı, basty sahna bolmaıdy. Festıvaldiń kempıngi erteń ádettegideı ashylady, — deıdi uıymdastyrýshylar.

«Het Laatste Nieuws» gazetiniń jazýynsha, basty sahnada ornatylǵan pırotehnıkalyq qurylǵylardyń biri durys istemeı qalýy múmkin. Festıvaldiń sońǵy bóliginde kóbine feıerverkpen árlengen shoý uıymdastyrylady.

Kelesi jumada nıderlandtyq dıdjeı Martın Garrıks basty sahnada óner kórsetýi kerek edi, al senbi kúni keshke mýzykant Nıkı Romeronyń shyǵýy josparlanǵan bolatyn. Uıymdastyrýshylar endi olardyń qaı jerde óner kórsetetinin qaıta qarastyrýǵa kóshti.

Aıta keteıik, osy aıdyń basynda Frantsııanyń Marsel qalasy mańyndaǵy ormanda ystyq aýa raıynyń saldarynan aýqymdy órt bolyp, 110 adam zardap shekken bolatyn

Sonymen qosa senbige qaraǵan túni Belgııanyń Batys Flandrııa provıntsııasyndaǵy Vestrozobeke qalasynda ornalasqan Horafrost muzdatylǵan kókónister shyǵaratyn kásiporynda iri órt boldy.