Belgııada polıtseılerdiń qýǵyn-súrgininen keıin 11 jastaǵy balanyń qaza tabýy rezonans týdyrdy

ASTANA. KAZINFORM — Belgııada 11 jastaǵy balanyń polıtseılerdiń qýǵyn-súrgininen keıin qaza tabýy qoǵamda keń rezonans týdyrdy. Oqıǵa Brıýsseldiń Ganshoren kommýnasynda boldy: polıtseıler toqtatýǵa áreket jasaǵan kezde elektrosamokatpen júrgen bala qashpaq bolyp, qulap jaraqat alyp, artynsha aýrýhanada kóz jumdy.

Qaıǵyly oqıǵa 2 maýsymda Brıýsseldegi «Elızabet» saıabaǵynda oryn alǵan. Fabıan esimdi bala – Shyǵys Eýropadan shyqqan otbasynyń múshesi – polıtseılerdiń talabyna baǵynbaı qashqan. Qýǵyn kezinde polıtseı kóligi ony qaǵyp ketken. Kýágerlerdiń aıtýynsha, kólik shamamen 40 km/saǵ jyldamdyqpen júrgen jáne onyń sırenasy men jaryq sıgnaly qosylmaǵan. Bul – avtokólikpen júrýge tyıym salynǵan saıabaq aýmaǵy bolatyn.

Fabıannyń óliminen keıin jergilikti turǵyndar saıabaqta gúl shoqtaryn qoıyp, shyraq jaǵyp, únsizdik mınýtyn jarııalap, eske alý jáne narazylyq sharasyn ótkizdi.

Belgııa bıligi polıtseıler tarapynan shamadan tys kúsh qoldaný deregi boıynsha tergeý bastady. Kólik júrgizgen polıtseı qamaýǵa alyndy. Sonymen qatar bılik balanyń mingen samokaty Eýroodaqtyń tehnıkalyq talaptaryna saı ma, joq pa – sony da tekserip jatyr. Bul samokatty satyp alǵan dúkenge reıd júrgizilgen.

Buǵan jaýap retinde osy aptada birneshe júzdegen polıtseı Brıýssel soty ǵımaratynyń aldynda ustalǵan áriptesine qoldaý bildirip, narazylyqqa shyqty. Aktsııaǵa Brıýssel-Batys bólimshesimen qatar, Antverpennen jáne basqa da jergilikti polıtsııa bólimderinen qyzmetkerler qatysty.

Belgııanyń jergilikti baspasózi sońǵy jyldary elde polıtsııa men samokat mingen jasóspirimder arasyndaǵy beıresmı teketirestiń ýshyǵyp kele jatqanyn jazady. Keıbir jaǵdaılarda mundaı samokattardy esirtki tasymaldaýmen aınalysatyn toptar paıdalanady.

Jyl basynda Brıýsseldiń bir aýdanynda birneshe atys oqıǵasy tirkelgen.