Belgııada qazaq tazysyna arnalǵan fotokórme uıymdastyryldy
ASTANA. KAZINFORM — Qazaqstannyń Belgııadaǵy elshiliginde Qazaqstannyń ulttyq ıt tuqymdarynyń biri — tazyǵa jáne onyń Uly dala mádenı murasyndaǵy ornyna arnalǵan «Tazy. The Grace of the Steppe» atty fotokórme ótti, dep habarlaıdy Kazinform agenttiginiń Brıýsseldegi menshikti tilshisi.
Fotokórmeniń ashylý rásimine Halyqaralyq kınologııalyq federatsııanyń (FCI) atqarýshy dırektory Iv de Klerk qatysty.
Kórmeniń 3 qyrkúıekte ótýiniń ózindik máni bar. Osydan eki jyl buryn, 2024 jylǵy 3 qyrkúıekte Halyqaralyq kınologııalyq federatsııa (FCI) qazaqy tazyǵa aldyn ala moıyndaý mártebesin berip, Qazaqstandy osy tuqymnyń shyqqan eli retinde bekitti.
«NOMAD» Ulttyq ańshylyq klýby» qoǵamdyq qorynyń múshesi Abzal Dosyman klýbtyń jıyrma jyldan beri qazaqy tazy men ulttyq ańshylyq dástúrlerdi dáriptep kele jatqanyn aıtty.
— Bizdiń basty maqsatymyz — qazaqy tazy tuqymnyń tól bolmysyn saqtap, damytý jáne ulttyq brendke aınaldyrý. Memleket basshysynyń qoldaýymen tazy men tóbetti saqtaý jáne damytý boıynsha naqty sharalar qabyldanǵannan keıin, bul baǵyttaǵy jumystardy odan ári kúsheıtýge múmkindik týdy, — dedi ol.
Onyń sózinshe, mundaı kórmeler buǵan deıin Fınlıandııa, Túrkııa jáne Estonııa elderinde uıymdastyrylǵan. Brıýsseldegi sharaǵa Belgııa ákimshiligi men Halyqaralyq kınologııa federatsııasynyń (FCI) atqarýshy dırektorynyń qatysýy Eýropada tazyǵa degen qyzyǵýshylyqtyń joǵary ekenin kórsetedi.
Fotokórmeniń ashylý saltanatynda FCI ókili Iv De Klerk bul tuqymnyń álemdik kınologııadaǵy mańyzyna toqtaldy.
— Qazaqy tazyǵa arnalǵan osyndaı erekshe kórmege qatysqanyma qýanyshtymyn. Qazaqstan úshin tazy — ata-babadan kele jatqan kóne mıras. Al Halyqaralyq kınologııa qaýymdastyǵy úshin onyń qyry men bolmysy keıingi jyldary ǵana keńinen tanyla bastady. Ony birneshe jyldan beri zerttep kelemiz. 2023-2024 jyldary tazynyń halyqaralyq deńgeıde moıyndalý úderisine tikeleı qatysqanymdy úlken mártebe sanaımyn. Tazy — júırik ıtter tobyn tolyqtyra alatyn biregeı tuqym. Sebebi onyń ańshylyq qabileti áli kúnge deıin saqtalǵan. Biz onyń tabıǵı ortadaǵy ańshylyq sheberligine kýá boldyq. Bul qasıet — tazynyń tabıǵı bolmysynyń bir bóligi. Sondyqtan ony joǵaltpaý kerek. Tazy salıýkı sekildi keıbir tuqymdarǵa uqsaıdy. Alaıda ózindik ereksheligimen daralanady. FCI-diń qazaqy tazyny moıyndaýynyń sebepteriniń biri de — osy biregeıligi, — dedi Iv de Klerk.
Buǵan deıin Halyqaralyq kınologııalyq federatsııanyń (FCI) tóreshisi qazaqy tazyǵa degen qyzyǵýshylyqtyń artyp kele jatqanyn aıtqan edi.
Aqzat Jıenalına
