Belgııada ınflıatsııa kúsheıip bara jatyr

ASTANA. KAZINFORM – Belgııanyń «Statbel» federaldy statıstıkalyq bıýrosy Belgııadaǵy ınflıatsııanyń sońǵy derekterin jarııalady. Osylaısha, qyrkúıekte jyldyq ınflıatsııa 3,06 paıyzdy qurady, bul tamyzdaǵy 2,86 paıyz kórsetkishinen 0,2 paıyzdyq tarmaqqa joǵary.

Jergilikti baspasózde atap ótkendeı, alkogol, temeki jáne benzın sııaqty taýarlardy esepke almaǵan tutyný baǵalary ındeksiniń ózgertilgen nusqasy – eldiń «densaýlyq ındeksi» tamyzdaǵy 3,20%-dan qyrkúıekte 3,83%-ǵa deıin ósti.

Bul kórsetkish mańyzdy, sebebi ol Belgııadaǵy jalaqy, járdemaqy jáne jaldaý aqysynyń ındekstelgen ósýin esepteý úshin qoldanylady. «Densaýlyq ındeksin» esepteý úshin paıdalanylatyn ónimder qorjynyna gaz jáne elektr energııasy da kiredi.

Sońǵy aıda elde energııa baǵasy kúrt ósti. Qazirgi ýaqytta gaz bir jyl burynǵyǵa qaraǵanda 14,8%-ǵa, al elektr qýaty 138,1%-ǵa qymbattady. Baǵanyń kóterilýi negizinen Belgııa úkimetiniń úı sharýashylyqtaryna 2022 jáne 2023 jyldardaǵy energetıkalyq daǵdarysty jeńýge kómektesý úshin qabyldaǵan sharalarynyń kúshin joıýymen baılanysty.

Sharalardy alyp tastaý ınflıatsııaǵa kelesi jyldyń aqpan aıyna deıin yqpalyn tıgizedi.

Energııa tasymaldaýshylardy esepke almaǵanda, qyrkúıekte jyldyq ınflıatsııa deńgeıi 2,71%-dy qurady, bul tamyz aıyndaǵy 2,47%-dan 0,24% joǵary. 

Sonymen qatar, Belgııada keıbir ónimderdiń baǵasy kúrt qymbattady. Máselen, teńiz ónimderiniń baǵasy ótken jylmen salystyrǵanda 38,6 paıyzǵa ósken. Temeki 27,6%-ǵa, qaǵazǵa orap jasaǵan temeki baǵasy 26,1%-ǵa, záıtún maıy 26,6%-ǵa qymbattady, alkogoldik sýsyndardyń ártúrli túrleriniń baǵasy da kúrt ósti.

Osy arada, shaı baǵasy ótken jylmen salystyrǵanda shaı 20,5%-ǵa, noýtbýk baǵasy 16,7%-ǵa, smartfon baǵasy 16,1%-ǵa arzandaǵan.

Jergilikti kólik júrgizýshileri benzın baǵasynyń arzandaǵanyn baıqady. Qazir kólikke janarmaı quıý bir jyl burynǵydan 16% arzan.