Belgııada Eýroparlamentke, federaldy jáne aımaqtyq organdarǵa saılaý ótip jatyr

ASTANA. KAZINFORM – Búgin Belgııada Eýroparlamentke, federaldy jáne aımaqtyq deńgeıdegi ókildi organdarǵa saılaý ótip jatyr, dep habarlaıdy  Kazinform-nyń menshikti tilshisi.

Saılaý ýchaskeleri jergilikti ýaqyt boıynsha tańǵy saǵat 8-de ashylyp, saǵat 16.00-de jabyldy. Belgııada saılaýshylar daýys berýge mindetti jáne kelmese, aıyppul arqalaýy múmkin.

8 359 908 belgııalyq saılaýǵa qatysýǵa shaqyrǵan hat aldy. Bul sanǵa eýropalyq saılaýda alǵash ret daýys bere alatyn 16 jáne 17 jastaǵy 244 myń jas saılaýshy kiredi. 255 myń belgııalyq shetelde daýys berýge tirkeldi.

Federaldy deńgeıde premer-mınıstr A.Kroo basqaratyn basqarýshy koalıtsııaǵa sotsıal-demokrattar, jasyldar, lıberaldar jáne hrıstıan-demokrattar kiredi.

Flandrııada zańsyz kóshi-qonǵa qarsy shyqqan ásire ońshyl «Flaams belang» partııasy tanymal bola bastady. Vallonııada jergilikti sotsıalısterdiń ustanymy kúshti bolyp qala beredi.

Ýchaskege barar aldynda A.Kroo velosıpedpen naýbaıhanaǵa baryp, jergilikti baspasózge túsinikteme berdi.

Alǵash ret koroldik otbasynyń tórt múshesi daýys berip jatyr: korol Fılıpp pen patshaıym Matıldanyń balalary – taq murageri Elızabeta hanshaıym (22 jasta), hanzada Gabrıel men Emmanýel jáne Eleonora hanshaıym (16 jasta).

Habarlanǵandaı, saılaýǵa Brıýssel aımaǵynyń parlamentine partııalyq tizim boıynsha úmitker retinde burynǵy qazaqstandyq Nazgúl Balmuhanova da qatysyp jatyr.