Belgııada eski ǵımarattyń jertólesinen 9 mln eýronyń altyny tabyldy
ASTANA. KAZINFORM – Belgııanyń Dendermonde qalasynda eski ǵımaratty qaıta jańǵyrtý kezinde qurylysshylar jertóle qabyrǵasyna jasyrylǵan, ishinde shamamen 9 mln eýronyń altyny bar seıfti tapty, dep habarlaıdy Anadolu.
Qazyna De Brand kompanııasynyń jumysshylary ǵımaratta jóndeý jumystaryn júrgizip jatqan kezde tabylǵan. Qazir buryn syra qaınatý orny bolǵan nysan CAW Oost-Vlaanderen áleýmettik kómek ortalyǵynyń keńsesine aınaldyrý úshin qaıta jańǵyrtylyp jatyr.
Seıftiń ishinen altyn quımalar men myńdaǵan kóne altyn moneta shyqqan.
– Tabylǵan zat týraly ǵımarattyń ıesi CAW uıymyna jáne quqyq qorǵaý organdaryna dereý habarlandy, – delingen aqparatta.
Polıtsııaǵa habar berilgennen keıin altyn qaýipsiz jerge jetkizildi.
Shyǵys Flandrııa prokýratýrasy altynnyń qaıdan shyqqanyn anyqtaý jáne onyń zańdy muragerlerin izdeý maqsatynda tergeý bastady.
Quny shamamen 9 mln eýro bolatyn qazynanyń aqyrynda kimge tıesili bolatyny ázirge belgisiz.
Oqıǵa jurtshylyqqa belgili bolǵannan keıin bul aýdanǵa altyn izdeýge nıetti turǵyndar kóptep kele bastaǵan.
Aıta keteıik, Norvegııa jerinen XI ǵasyrdyń eń iri qazynasy tabyldy.
