Belgııada boıkotqa ushyraǵan Izraıl dırıjeri Berlındegi festıval shaqyrtý aldy

ASTANA. KAZINFORM — Berlındegi mýzyka festıvali Belgııada kontserti toqtatylǵan ızraıldik dırıjerdi shaqyrdy, dep jazdy DW.

36 jastaǵy ızraıldik pıanıst Lahav Shanı 15 qyrkúıekte Berlındegi festıvalde óner kórsetedi.

Ony Berlın fılarmonııa qory men Berliner Festspiele kontsertterin uıymdastyrýshy uıym Konzerthaus Berlin-men birlesip shaqyrǵan.

Bul — «óner men ǵylym salasyndaǵy antısemıtızmge, kemsitýshilikke jáne boıkotqa qarsy turýǵa baǵyttalǵan yntymaqtastyq pen birlik belgisi», dep habarlaıdy rbb medıakompanııasy.

Lahav Shanı Mıýnhen fılarmonııalyq orkestri jáne skrıpkashy Lıza Batıashvılımen birge Bethoven men Vagnerdiń shyǵarmalaryn oryndaıdy.

Buǵan deıin Belgııanyń Gent qalasynda ótetin Flanders Festival mýzykalyq festıvaliniń uıymdastyrýshylary Mıýnhen fılarmonııalyq orkestriniń kontsertin toqtatqan bolatyn. Olar muny Shanıdiń orkestrdiń bolashaq bas dırıjeri ekendigimen túsindirdi.

Festıval uıymdastyrýshylary Shanı «beıbitshilik pen tatýlasýdy qoldaıtynyn birneshe ret málimdegenine» qaramastan, «onyń Izraıl fılarmonııalyq orkestriniń bas dırıjeri retindegi róline baılanysty Tel-Avıvtegi genotsıdtik rejımge kózqarasyn naqty bildire almaıtynyn» aıtty.

Flanders Festival sheshimin birqatar mádenıet qaıratkeri, sonyń ishinde nemis pıanısi Igor Levıt antısemıtızm dep aıyptady.

Germanııanyń mádenıet máseleleri jónindegi memlekettik mınıstri Volfram Vaımer de festıval uıymdastyrýshylaryn synǵa alyp, bul áreketti «Eýropa úshin uıat qylyq» dep atady.

Osydan buryn Belgııada Mıýnhen fılarmonııasynyń kontserti ızraıldik dırıjerdiń qatysýyna baılanysty toqtatylǵanyn jazǵan edik.