Belgııada bala qaterli isiktiń aıyqpas túrin jeńdi

Belgııalyq 12 jastaǵy Lýkas qaterli isiktiń jazylmaıtyn túrin jeńgen álemdegi alǵashqy bala, ol qazir remıssııa kezeńinde, dep habarlaıdy QazAqparat bul týraly Le Figaro arnasyna silteme jasap.

Bul balalyq shaqtaǵy qaterli isiktiń óte agressıvti túrin – mı baǵanynyń ınfıltratsııalyq glıomasyn jeńe alǵan álemdegi birinshi jaǵdaı.

Lýkas Val-de-Marndaǵy Gıýstav Rýssı ınstıtýtynda baqylanyp, BIOMEDE dep atalatyn klınıkalyq synaqqa alyndy. Bul jaǵdaıda naýqastardy emdeý dıagnoz kezinde alynǵan bıopsııa negizinde júzege asyrylatyn isikterdiń DNQ sekventsııasyna sáıkes taǵaıyndalady.

Lýkastyń aǵzasy aýrýmen birte-birte kúresti. Bes jyldyq baqylaýdan keıin dárigerler emdeýdi toqtatý týraly sheshim qabyldady. Nátıjesinde bala bir jyldan beri em qabyldamaı-aq ómir súrip jatyr jáne ózin jaqsy sezinedi.

Gıýstav Rýssı ınstıtýtynyń málimeti boıynsha, jyl saıyn 50-ge jýyq bala mı baǵanynyń ınfıltratsııalyq glıomasynan zardap shegedi. Bul mı isigi óte agressıvti jáne onymen aýyratyn naýqastardyń bolashaǵy óte nashar boljanady.