Belgııada aty ańyzǵa aınalǵan «Spa Classic 2026» avtojarysy ótip jatyr
ASTANA. KAZINFORM — Belgııanyń Circuit de Spa-Francorchamps stadıonynda osy demalys kúnderi motosport álemindegi aıtýly oqıǵa Spa Classic 2026 ótedi, dep habarlaıdy Kazinform agenttiginiń menshikti tilshisi.
Eýropadaǵy eń kúrdeli jarys trassalarynyń birinde ótken dáýirdiń ańyzǵa aınalǵan avtokólikteriniń motor úni estilip jatyr. Bıyl festıval 14-ret uıymdastyrylyp, klassıkalyq avtosporttyń myńdaǵan jankúıerin jınady.
Uzyndyǵy 7 shaqyrymnan asatyn trassa ashyq aspan astyndaǵy naǵyz mýzeıge aınaldy. Munda Porsche, Ferrari, Jaguar, Lola, Chevron jáne basqa da markalardyń sırek kezdesetin kólikterin kórýge bolady.
Senbi kúni kórermender baı jarys baǵdarlamasyn tamashalady. Olardyń qatarynda 1980–1990 jyldardaǵy ańyzǵa aınalǵan prototıpter qatysqan «Group C Racing», tózimdilikke arnalǵan Classic Endurance Racing, Endurance Racing Legends, Sixties’ Endurance, Heritage Touring Cup jarystary, sondaı-aq jańa «GT3 Revival Series» serııasy boldy.
Іs-sharanyń basty erekshelikteriniń biri dástúrli túrde túngi jarystar sanalady.
Spa Classic jarysy kásibı avtoshabandozdarymen qatar tanymal áýesqoı júrgizýshilerdi de tartady. Kelýshiler eski kólik motorynyń gúrili, janarmaı ıisi men Belgııadaǵy Ardenn taýlarynyń kórkem tabıǵaty úılesken erekshe atmosferany atap ótti.
Aıta keteıik, qazaqstandyq shabandoz halqaralyq avtojarystyń chempıony atandy.
