Belgııada bıyldan bastap mektepterde smartfondardy qoldanýǵa tyıym salynady
ASTANA. KAZINFORM — 2025–2026 oqý jyldary aralyǵynda Belgııanyń bastaýysh jáne orta mektepterinde uıaly telefondar men basqa elektrondyq qurylǵylardy qoldanýǵa qatysty jalpyulttyq tyıym engiziledi, dep jazady Anadoly.
Jergilikti BAQ-tyń habarlaýynsha, bul tyıym eldiń barlyq aımaqtarynda kúshine enedi jáne oqý maqsatynan tys uıaly telefondar men basqa da qurylǵylardy paıdalanýǵa qatysty bolady. Medıtsınalyq qajettilik nemese tótenshe jaǵdaı sııaqty erekshe jaǵdaılarda ǵana oqýshylarǵa telefon qoldanýǵa ruqsat beriledi.
Belgııadaǵy úsh tildik qaýymdastyqtyń ártúrli erejeleri bolsa da, bul jańa tyıym búkil el aýmaǵynda qoldanylady. Sonymen qatar, mektepter tártip erejelerin buzǵandarǵa qandaı tártiptik shara qoldaný kerektigin ózderi anyqtaı alady.
Frantsýz tildi qaýymdastyq
Vallonııa men Brıýsseldegi frantsýz tilinde oqytatyn mektepterde bastaýysh mektepter úshin telefon qoldanýǵa tyıym salý 2024–2025 oqý jylynan bastap kúshine endi. Al orta mektepterde telefon qoldaný «shekteýli» túrde ruqsat etilgen.
Jańa qaýlyǵa sáıkes, 2025–2026 oqý jylynda balabaqshalarda, bastaýysh jáne orta mektepterde oıyn-saýyq maqsatynda telefon men basqa da elektrondy qurylǵylardy qoldanýǵa tolyq tyıym salynady.
Nemis tildi qaýymdastyq
Nemis tildi óńirde 2025–2026 oqý jylynan bastap uıaly telefondardy, smart-saǵattardy jáne basqa da qosylǵan qurylǵylardy sabaq kezinde ǵana emes, úzilis ýaqytynda da qoldanýǵa tyıym salynady.
Naqty erejeler men tártiptik sharalardy ár mektep ózi belgileıdi.
Flamand qaýymdastyǵy
Nıderland (flamand) tilinde sóıleıtin óńirde tyıym balalar baqshalary men bastaýysh mektepterde qazirdiń ózinde qoldanysta.
Endi bul shekteý orta mektepterge de kezeń-kezeńimen engiziledi: orta mekteptiń alǵashqy eki synybynda uıaly telefondar men smart-saǵattardy qoldanýǵa tolyqtaı tyıym salynady, al úshinshi synypta – tek sabaq ýaqytynda qoldanýǵa bolmaıdy.
Belgııa mektepterinde oqý jyly frantsýz tildi mekemelerde 25 tamyzda, al qalǵan mektepterde 1 qyrkúıekte bastalady.
Budan buryn Belgııa parlamentiniń músheleri otbasylardy biriktirýdi shekteıtin úkimettik zań jobasyn qabyldady. Bul shema elde zańdy túrde turatyn shetel azamattaryna bir nemese birneshe otbasy múshelerin ákelýge múmkindik beredi