Belgııa jaǵalaýynan 30-ǵa jýyq mıgranty bar qaıyq tabyldy
ASTANA. KAZINFORM — Belgııanyń Batys Flandrııa provıntsııasyndaǵy Nıvport qalasynyń jaǵalaýynan bortynda 30-ǵa jýyq mıgranty bar shaǵyn qaıyq tabyldy. Ol teńizde basqarý múmkindiginen aıyrylyp, qalqyp júrgen, dep habarlaıdy Kazinform agenttiginiń menshikti tilshisi jergilikti VRT telearnasyna silteme jasap.
Polıtsııanyń málimetinshe, jeksenbi kúni tańǵy saǵat 05:30 shamasynda Soltústik teńizde Belgııa jaǵalaýyna jaqyn jerde apatqa ushyraǵan qaıyq týraly 112 qyzmetine habar túsken. VRT deregine qaraǵanda, qońyraýdy qaıyqtaǵy adamdardyń ózderi shalǵan.
Teńizdegi kórinistiń nasharlyǵyna baılanysty izdeý jumystary qıyndaǵan. NH90 tikushaǵy qaıyqty tańǵy saǵat 08:00–ge deıin Nıvport jaǵalaýynan úsh shaqyrymnan astam qashyqtyqtan tapty. Bortta tek er adamdar bolǵan. Federaldyq polıtsııa ókili Ann Bergerdiń aıtýynsha, qaıyq áli de sý betinde qalqyp júr, alaıda basqarý múmkindiginen aıyrylǵan bolýy yqtımal.
Mıgranttar qaıyqtan túsýden bas tartqan. Qutqarý jáne polıtsııa qyzmetteriniń úsh kemesi oqıǵa ornynda qalyp, jaǵdaıdy baqylap otyr. Jeksenbi kúngi túske deıin qaıyq Nıvport mańynda bolǵan jáne ony jaǵalaýdan kórýge múmkindik bolǵan.
Bul oqıǵa Belgııa jaǵalaýynan shaǵyn qaıyqtarmen La-Mansh buǵazyn kesip ótý áreketteri kóbeıgen tusta boldy. Osydan bir apta buryn Nıderlandtyń Breskens qalasy mańynda 38 adam mingen qaıyq sýdan shyǵarylǵan. Keıin onyń Nıderland aýmaǵynan shyqqany anyqtalǵan.
Eske salaıyq, buǵan deıin Djıbýtı jaǵalaýynda mıgranttar mingen qaıyq aýdarylyp, 139 adam qaza tapqanyn habarlaǵan edik.
