Belgııa temeki ónimderin dúken sórelerine qoıýǵa tyıym saldy

ASTANA. KAZINFORM — Seısenbi kúni Belgııada kúshine engen jańa zań dúken sórelerine temeki nemese kez kelgen temeki ónimin qoıýǵa tyıym saldy, dep habarlaıdy Euronews. 

Al aýdany 400 sharshy metrden asatyn sýpermarketter men basqa da dúkenderge endi olardy satýǵa múldem tyıym salynǵan.

Temeki shegýdi tolyǵymen joıý josparynyń bóligi bolǵan sharalar temeki jáne táýeldilik týdyratyn basqa da ónimderdiń dúken sóresinde kórinip turýyn shekteýge arnalǵan.

Belgııanyń densaýlyq saqtaý mınıstri Frank Vandenbrıýktiń basshylyǵymen 1 qańtarda bir rettik elektrondy temekige tyıym salýdy qamtıtyn baǵdarlama iske qosyldy.

— Bizdiń maqsatymyz — 2040 jylǵa qaraı urpaqty tútinnen erkin etý, — dep túsindirdi Vanderbrıýk.

Ol temekige tolyq tyıym salý týraly áńgimeni joqqa shyǵardy.

— Budan bylaı temekini nemese veıpti dúken sóresine, ıaǵnı kózge kórinetin jerge qoıýǵa tyıym salynady. Bul zattardy satyp alýǵa tyıym salynbaıdy. Satyp alýǵa bolady, biraq satýshydan suraý kerek, — dedi ol.

Bólshek saýdagerlerge temeki ónimderin qoıýǵa baılanysty naqty nusqaýlar nemese materıaldar usynylǵan joq. Árbir dúken máseleniń sheshimin ózi tabýy kerek boldy — keıbireýleri temeki ónimderin qoldan jasalǵan plastıkalyq perdemen jasyrsa, taǵy basqalary ashylǵan kezde avtomatty túrde janyp turatyn kúrdeli sórelerge saldy.

Osyǵan deıin Belgııa astanasynda qazaqstandyq zergerdiń kórmesi ótip jatqany málim boldy.